Un total di 6 grupo lo participa den e Parada Nacional di Luz

ORANJESTAD (AAN):  Minister di Cultura, Xiomara Maduro a tene un reunion cu e lidernan di e gruponan cu ta bay participa den e Parada Nacional di Luz,

cual ta un antesala di locual ta bira e celebracion di e dia nacional otro luna.

Ta bay cend'e mecha dia 26 di Februari y pa e motibo ey a sinta diahuebs cu tur e gruponan cu si a bisa cu nan kier participa pa asina pasa den tur e reglanan pasobra esaki no ta un parada normal di carnaval, pero ta un momento pa haci un fundraising pa asina por bay representa den locual ta bay bira carnaval 2023, a bisa.

Den un ambiente hopi ameno Minister Maduro hunto cu Comision Celebracion Dianan Nacional a reuni cu lidernan di grupo pa por contesta tur nan pregunta relaciona cu e parada nacional di Luz. 

Presente na e reunion tabata te’y lider di Empire, Majestic, Infinty, Dushi, Pink for Life y Royal Carnival Group.  Minister Maduro a duna un splicacion amplio kico ta e meta di e parada y pakico ta organisa un parada nacional. E parada ta wordo organisa pa CCDN como meta pa yuda e gruponan y bandanan musical recauda fondo pa carnaval 2023. E parada aki ta pa yuda pueblo kita e miedo y drenta bek e normalidad y celebra cu nos tin bida y  drenta e luna cultural maart 2022. 

Segun e lidernan di grupo cu nan participantenan tin hopi animo pa celebra un biaha mas den un parada. Bandanan cu ta lo ta presente den e parada ta: D’licious, NBO, Upgrade Music & Jeon, Youth Xtreme, Le Groove y Buleria.   

Minister di Cultura a gradici SMAC pa e cooperacion pa por a haya e gruponan di carnaval hunto y tambe Stichting Musica cu a duna su contribucion pa cu e contactonan cu e bandanan di carnaval. 

Maduro a agrega cu esaki tabata un bon reunion. Tin gana y tin entusiasmo grandi. Aruba ta den su strategia di salida y "kico mas mihor cu nos tur por bini hunto como pais, como grupo, como bandanan pa asina nos por disfruta di locual ta di nos, cual ta bira e ora eynan e parada nacional di luz aki".

El a haci un invitacion pa join bo grupo preferi y den e parada luci e colornan di e bandera di Aruba.

Un total di 6 grupo lo participa den e parada nacional di luz dia 26 di Februari proximo, asina Lyonel Dirksz, PR di e Parada Nacional a duna di conoce.

Stichting Musica a expresa cu nan ta hopi contento cu e iniciativa aki pa asina haci dia 26 un parada y duna un oportunidad pa e musiconan por subi caminda despues di un largo tempo.

Sra. Edwina di Stichting Musica a desea tur hende hopi exito y tambe a invita pueblo di Aruba pa brasa e prome parada despues di un largo tempo y "laga nos tur ban sinti nos cu nos ta un Aruba dushi".