ORANJESTAD (AAN): Pa algun tempo caba Pharetza Bertad-Damon di ministerio di Salubridad, Medio Ambiente y Naturaleza di Corsow,
tabata na Aruba pa duna un curso special na maestronan nobo di SKOA, riba con pa duna muchanan di 5de y 6de klas educacion sexual.
Despues cu e 33 maestronan a haya e training y a aplica esaki corectamente na scol nan a ricibi e reconocimento, door di haya un certificado Diahuebs.
Bertad-Damon den un entrevista a splica cu e meta principal di e curso di educacion sexual, ‘Biba Amor’, tin como meta principal ta pa forma e mucha cu informacion corecto, pa asina e mes por tuma decisionnan corecto pa loke ta trata su desaroyo sexual.
“Biba Amor no ta pa bay activa ningun mucha, sino simplemente e mucha ta den su periodo cu e ta cuminza experimenta y ta bon pa e tin bon informacion”.
No solamente door di maestro y maestranan sino tambe door di mayornan tambe, pa asina ora cu e mucha tin cu tuma un decision, e ta tuma decisionnan cu e no ta cay den gruponan di riesgo, segun Bertad-Damon.
El a sigui bisa cu na final e meta riba termino largo ta pa e cantidad di embarazo hubenil baha, pero tambe pa evita mas posibel y baha e cantidad di enfermedad sexual transmissible.
https://diario.aw/categories/noticia/general/un-total-di-33-maestro-a-ricibi-certificado-di-biba-amor#sigProId3e0d793404
