ORANJESTAD (AAN): Diaranson a tuma lugar e asina yama Trade Mission to Panama y den un entrevista Alexis Muñoz, promotor di exportacion pa Panama,
a splica cu di parti di minister di Comercio y Industria di Panama el a bin Aruba hunto cu un delegacion di 11 empresa Panameño di sector di alimento y bebida.
“Mas cu tur cos nos ta buscando pa presenta nos oferta pa exportacion den region di Caribe y den e caso aki pa e bunita pais Aruba, cu ta un mercado hopi importante y tambe strategico pa nos nacion”.
Nos kier probecha di e tratado di comercio liber entre Panama y Aruba y tambe di e proximidad cu e dos paisnan tin cu otro, segun Muñoz.
El a splica cu sigur si bo bira e problemanan cu a wordo causa pa e pandemia, un bon relacion entre e dos mercadonan lo trece hopi beneficio pa ambos.
DIARIO a puntra Muñoz con bon e ofertanan por ta pa Aruba, mirando e aumento mundial den costonan di producto.
El a trece dilanti cu e prijs di flete a aumenta mundialmente, pero cu danki na proximidad di e dos paisnan, eynan por spaar den gasto y bira mas competitivo pa loke ta e nivel di prijs.
“Panama tin un presencia caba den e mercado di Aruba y awor nos ta buscando pa fortalece e presencia aki, via nos contacto cu minister di Desaroyo Sostenibel y Economia y Camara di Comercio”, segun Muñoz.
https://diario.aw/categories/noticia/general/un-total-di-11-empresa-di-panama-presente-na-aruba-pa-trade-mission-to-panama#sigProIdb9e6582796
