Exitoso Torneo di Pesca
ORANJESTAD (AAN): Recientemente a tuma lugar e tan spera Torneo y Dia di Famia celebrando Dia di Piscado na Centro di Pesca Hadicurari na Palm Beach. Un total di 42 boto a inscribi apesar di un biento feroz cu tabata supla e simannan prome cu e torneo. Di e eseynan un total di 30 a bolbe pier y pisa e piscanan valido pa e competencia entre piscadonan. Na final di e atardi a raporta cu un total di 1045,4 kilo di pisca a keda pisa oficialmente.
E celebracion a cuminsa for di marduga, ora botonan a cuminsa raporta nan salida. Botonan a sali for di tur puerto di Aruba y a manda potretnan di team na salida den un ambiente alegre y positivo. Na e centro riba beach for di 11’or publico a cuminsa yega bao di tentnan grandi unda e celebracion a tuma luga, pa purba varios plato cu Wine and Dine Aruba y varios vendor di Santa Rosa a ofrece.
Botonan a cuminsa drenta y pisamento a cuminsa cu musica di DJ y asina mas hende a acumula pa celebra hunto cu e piscadonan.
Alrededor di 2:00 pm tabata super druk unda hopi boto a yega cu hopi pisca y grandi. E banda Dushi Vibez tabata deleita publico cu musica en bibo y varia, cual a sa di pone hopi hende rek pia riba e pista di baile te den oranan laat di atardi.
Ganadornan: Pa 5:00 pm en punto a cuminsa cu entrega di premio na ganadornan. E mulato di mas grandi a bay pa e Kraken Fishing Team di capitan Robby Solognier cu a pisa un mulato di 13 Kilo. E conofes mas grandi e torneo a keda pa e team Queen Sophia di Capitan Edward Dirks pisando 17.6 Kilo. E categoria di Jacks a bay pa e Team di STC Boys di e boto Edilane cu a marca balansa na 16.6 Kilo.
E Dorado of Mahimahi mas pisa di e torneo tabata 12.2 Kilo di Driftwood Fishing Team bao liderato di Sergio Rasmijn. E Picuda di mas grandi tabata pisa 16.2 Kilo di e team Caba Lama di Noord di capitan Jimmy Olivir. E ekipo di Bloemond boys cu e boto Adelice di Capitan Glembert Bislip a bay cu e premio di mayor ehemplar di Tuna cu a kibra e balansa na 9.3 Kilo.
E famia di pisca di Snapper of Pargo a keda gana door di e team di Techi Boys cu Marcel, Leo y Quito Briesen kendenan a barca un Caraña of Cubera Snapper cu a pisa 22.9 Kilo. E ehemplar aki a bay tambe cu e premio di Pisca mas grandi di henter e torneo como tambe a resulta di ta e ehemplar mas grandi den e categoria di boto grandi.
E Djampou/Mero of grouper mas grandi e torneo tabata un Wasa of Djampou preto (Warsaw grouper) di 18.5 Kilo gara door di Shaustienne Fishing Team di Agustin y Chin Kelly. E pishiporco mas grandi pisa e atardi ey tabata 2.3 Kilo gara door di e team La Mia Familia di e boto Rosalia di capitan Tibo Vasquez.
E boto IDA di capitan Han Jing Dong a gana e mayor ehemplar Bonacanap/Robeki pisando 0.5 Kilo. Wow’i Yendi, un premio pa e reto special cual e organisacion Baranca Boat Fishing Aruba ta pone disponibel a bay pa e team Shalom di e boto Shalom II bou mando di capitan Julio Dirks.
Den e categoria di boto bou 24 pia e premio pa mayor ehemplar a keda pa un caraña di 20.9 Kilo poni riba nomber di e team Ban p’e di e boto My Darling di Capitan Buchi Briesen.
Den e categoria di boto chikito (bou 24 pia y maximo 3 participante abordo) ganadornan di mas pisca gara, esta mayor kilahe, ta lo siguiente. Na di tres luga a keda e team di Ban p’e di e boto My Darling di capitan Buchi Briesen cu en total 45.1 kilo di pisca valido. Na di dos luga a keda e team Picuda Boys di e boto Doña Filomena di capitan Jacintho “Chin” Christiaans cu un total di 67.5 kilo. Na prome luga como tambe ganador di e POT pa boto chikito cu 75.2 kilo registra a keda e team di Ida di e boto Ida cu capitan Han Jing Dong na timon.
Den categoria di boto grandi (riba 24 pia largo y cu maximo 5 hende abordo) e premionan pa mayor kilahe a keda reparti den e siguiente manera. Di tres luga a bay pa Bloemond Boys di capitan Glember Bislip di boto Adelice cu a 77.9 kilo total kilahe. Na di 2 luga a keda STC Boys di boto Edilane cu a pisa 126.8 kilo total kilahe. Ganador di prome luga y tambe a bay cu e pot di piscado tabata indudablemente e team di Techi Boys di Marcel, Leo y Quito Briesen cu a pisa 138 kilo total kilahe. Un pabien ta bay na tur e ganadornan.
Un danki pa tur e participantenan pa nan esfuerso, contribucion y demostracion cu piscamento ta parti integral di e cultura di Aruba cu por produci un total di mas cu 1.045 kilo di pisca den un anochi pa atardi. Boso sacrificio, paso nos ta reconoce e gastonan enorme y tempo hinca den boto, ekipo y preparacion, pa despues sali pa lama bringa ola, solo, salo y pisca, ta algo di respeta. Pesey danki na tur piscado. Danki tambe ta bay pa tur e publico cu a asisti.
Masha agradecido nos ta na tur e voluntarionan y otro actornan cu den un forma of otro a sa di contribui cu alma y curason na haci e evento aki posibel y exitoso. Danki na boso. Na Wine and Dine Aruba cu su restaurantnan di Hadicurari y Nos Clubhuis cu a sa di carga cu mayoria parti di e logistica y mucho mas pa logra realisa e evento na e centro di e forma aki e aña aki. Comision organisado como tambe directiva di Fundacion Centro di Pesca Hadicurari ta yama danki na un y tur pa contribui na e celebracion di Dia di Piscado 2026.
