*Gobierno a coordina situacion di pasahero cu a keda pega na Aruba
ORANJESTAD (AAN): Durante conferencia di prensa di actualisacion diabierna anochi, Prome Minister Mike Eman y Minister di Turismo, Transporte y Labor, mr. Wendrick Cicilia a anuncia cu espacio aereo di Merca a habri bek, despues di e interupcion causa pa un problema tecnico den e sistema di control di trafico aereo na Merca.
A pesar di e desaroyo positivo aki, por lo menos nuebe vuelo cu mester a sali for di Aruba no por continua nan biahe, loke ta resulta den un total di aproximadamente 1.672 pasahero adicional cu mester keda na Aruba durante e anochi.
Prome Minister a splica cu, aunke espacio aereo a habri bek, companianan aereo mester tene cuenta cu e protocolnan obligatorio di descanso di piloto, loke ta imposibilita salida inmediato di e vuelonan concerni.
E mandatario a destaca cu reapertura di espacio aereo di Merca ta un bon noticia, considerando e importancia di Merca den conectividad aereo internacional y e impacto cu un interupcion di tal magnitud por tin riba henter mundo, incluyendo Aruba.
Inventarisacion di acomodacion pa 1.672 pasahero
E prioridad di Gobierno durante e anochi ta pa sigura cu e pasaheronan cu no por continua nan biahe tin un luga adecua pa hospeda.
Prome Minister Eman a indica cu tanto companianan aereo como pasaheronan mes ta activamente buscando acomodacion den hotelnan, Airbnb y otro facilidadnan turistico.
Mientras tanto, centro nacional di maneho di crisis ta sigui inventarisa disponibilidad di camber den diferente hotel y otro acomodacion turistico, pa determina e cantidad di pasahero cu eventualmente lo mester asistencia adicional.
Prome Minister a referi na experiencia di algun luna pasa, ora Aruba a confronta un situacion similar cu casi 2.000 pasahero afecta. Durante e ocasion ey, a prepara ballrooms y centro di convencion como alternativa, aunke finalmente mayoria di e pasaheronan a logra haya acomodacion.
Preparacion di facilidadnan pa acomodacion temporal
Como medida preventivo, Gobierno ta coordinando disponibilidad di diferente ballroom y otro facilidad cu por wordo uza pa acomoda pasaheronan durante e anochi.
En caso cu disponibilidad di camber di hotel y Airbnb no resulta suficiente, CMO, cu sosten di Marinierskazerne, lo coordina colocacion di cama den e facilidadnan necesario.
Prome Minister a enfatisa cu e scenario ideal ta pa tur pasahero por haya acomodacion regular den un hotel, apartament of Airbnb. Sinembargo, Gobierno ta preparando alternativanan pa garantisa cu esnan cu no logra haya acomodacion tin un luga adecua y sigur pa pasa e anochi.
Coordinacion intensivo entre tur instancia concerni
Prome Minister Mike Eman a destaca e colaboracion intensivo entre tur departamento, instancia y organisacion cu ta forma parti di e structura nacional di maneho di crisis.
Bou coordinacion di CMO, diferente instancia, incluyendo Aruba Airport Authority, Aruba Tourism Authority, AHATA, Cuerpo Policial Aruba, Cuerpo di Bombero y otro departamento concerni, ta trahando continuamente pa actualisa informacion y coordina e esfuersonan necesario.
Tambe tin contacto cu sector di transporte, incluyendo central di taxi, considerando cu hopi pasahero ta saliendo for di aeropuerto pa busca acomodacion.
E mandatario a indica cu, mediante e contacto continuo entre aeropuerto, companianan aereo, hotelnan y sector di transporte, ta obteniendo un bista cada biaha mas completo di e cantidad di pasahero cu ainda mester asistencia.
Aeropuerto ta completamente operacional
Prome Minister a confirma cu Aeropuerto Internacional Reina Beatrix ta completamente operacional. Minister Arthur Dowers lo ta presente y coordinando for di e punto ey, caminda instancianan concerni ta sigui traha pa atende cu tur aspecto operacional, incluyendo servicio di inmigracion.
Cu reapertura di espacio aereo di Merca, ta spera cu durante diasabra trafico aereo por bolbe gradualmente na su operacion normal.
Mientras tanto, e enfoke principal di centro nacional di maneho di crisis ta dirigi riba e reto inmediato di acomoda pasaheronan durante e anochi di diabierna.
Aruba ta demostra su capacidad y hospitalidad
Prome Minister Mike Eman a expresa su aprecio pa e disposicion y colaboracion di tur instancia cu a responde inmediatamente na e situacion.
E mandatario a destaca cu Aruba ta bon prepara pa atende cu situacionnan di e naturaleaa aki y cu e coordinacion entre diferente instancia ta fundamental pa brinda accion adecua.
Un biaha mas, Aruba ta demostra su capacidad di maneha situacionnan inespera, poniendo e siguridad y bienestar di nos bishitantenan como prioridad y ofreciendo e hospitalidad cu nos isla ta conoci p’e.
Gobierno di Aruba lo sigui monitorea e situacion di cerca y mantene comunidad informa conforme cu informacion adicional bira disponibel.