Dia Mundial di Cancer
ORANJESTAD (AAN): Tur aña riba 4 di februari, rond mundo nos ta observa Dia Mundial di Cancer, un dia dedica na conscientisa y informa comunidad riba prevencion, deteccion tempran, y tratamento di cancer. Pa e ocacion aki Departamento di Salud Publico di Aruba (DVG) lo ta enfatisando riba un punto crucial: E impacto dañino cu consumo di alcohol tin y su fuerte relacion cu cancer!
Alcohol ta un factor importante cu ta contribui na desaroyo di varios tipo di cancer. E Organisacion Mundial di Salud (WHO) na 2019 a reporta cu 4.4% di e total di diagnostico di cancer y tambe 401,000 morto debi na cancer tawata tin un relacion directo cu consumo di alcohol. Alcohol y cancer tin un conexion serio.
Alcohol por causa cancer den diferente parte di bo curpa incluyendo; boca, garganta, larynx, higra, pecho, tripa y rectum. No tin un nivel sigur di consumo di alcohol pa evita cancer. Cada bebida ta conta y e riesgo ta cuminsa desde e prome bebida y ta aumenta segun ta bebe mas. Pa personanan cu ta bebe alcohol excesivamente e riesgo ta hasta 30 bes mas halto y si ta huma, e riesgo ta subi drasticamente mas ainda.
Estadistica di Cancer na Aruba
Entre 2011 y 2021 DVG a reporta cu e tipo di cancer cu mas ta causa mortalidad na Aruba ta:
- Cancer di pulmon
- Cancer di luchtpijp (trachea)
- Cancer di pecho
- Cancer di tripa y rectum
Un total 740 persona a fayece na Aruba durante e periodo di 2011 pa 2021 pa motibo di cancer.
Segun investigacionnan global, entre 30% y 50% di morto di cancer por wordo preveni si nos evita cierto factornan di riesgo manera entre otro consumo di alcohol. Deteccion tempran y tratamiento adecuado tambe ta reduci e impacto di cancer.
Pa reduci e posibilidad di desaroya cancer, DVG ta recomenda:
- No huma of vape
- Mantene un peso saludable
- Come saludable, incluyendo fruta y berdura
- Haci ehercicio regularmente
- Limita consumo di alcohol na consumo poco frecuente
- Usa proteccion durante relacion sexual
- Vacuna contra hepatitis B y HPV
- Uza sun block regularmente pa evita exposicion na rayonan di solo
