Un strea artistico otorga na Henri Rodriguez

ORANJESTAD (AAN): Ya ta hasi un aña cu e conocido musico Henri Rodriguez a fayece, pero su logronan ta keda bibo.

            Tabata diadomingo ultimo 14 di November cu e FUNDACION PA ARTE Y CULTURA BONEIRO, a otorga Henri su strea artistico den e dushi barrio di RINCON na Boneiro, anto riba e Plaza O.E.(TAVIO) St. JAGO.

            E strea a wordo devela dilanti di su famia, conocir, amigonan y yiunan y a haya un lugar prominente meymey di e otro 15 otro baluartenan di Cultura Boneriano.

            Pa esnan cu no sa Henri Rodriguez a nace na Aruba, pero na un edad hopi tempran a viaha pa Bonaire hunto cu su famia. Aya el a desplega un trayectoria hopi largo y exitoso den musica. Como bahista el a desaroya te yega na bira maestro musical, compositor, y areglista. Un di gruponan cu el a forma parti di dje, a realisa varios presentacion na Corsow, Boneiro y Venezuela.

            Aki na Aruba na su regreso a forma parti di e popular LATIN FOUR y a yuda funda ENERGIE BRASS como tambe miembro di TBS BRASS dirigi pa su propio yiu homber Gerardo ‘Bashaka’ Janga.     Durante e ultimo añanan el a figura tambe den e gospel band GOD SONS di su amigo Sr. Gregory Goedgedrag.

            Aunke e ta un nativo di Aruba ,pero su stimacion pa Boneiro tabata grandi, y nunca a lubida su amigonan Boneriano cu a yude na forma su mes musicalmente. E bunita gesto aki ta resultado di e stimacion aki ,cual a wordo altamente aprecia pa su famia, cu ta sinti cu awo nan querido HENRI no ta un strea den cielo solamente, pero na riba e suelo Boneriano tambe.