ORANJESTAD (AAN) – Siguiendo cu e ciclo di reunionnan cu e stakeholders, den cuadro di formacion di Gabinete Wever-Croes II, Formador Evelyn Wever-Croes a reuni cu Banco Central Aruba.
Den conferencia di prensa di gobierno, señora Jane Semeleer, Director di Banco Central a elabora tocante e reunion aki.
Señora Semeleer a menciona cu e reunion a bay bon, den bon ambiente y tabata tin hopi pregunta. Banco Central a prepara un plan preliminar riba diferente tereno.
Desaroyo economico ta un di e terenonan cu BC y Formador a discuti. Semeleer a expresa cu Banco Central no kier papia mas di crecemento economico sino di desaroyo economico unda tur hende ta inclui den e trayectoria aki.
“Tambe nos a discuti riba e parti di educacion financiero, cu nos ta haya hopi importante como parti di e causanan principal di pobreza den nos pais, pa tur hende haya educacion financiero” Director di Banco Central Jane Semeleer a señala.
E funcionario a menciona tambe cu Banco Central a cambia su forma di duna conseho e aña aki, y a scoge diferente escenario pa e discusion cu Formador, y el a reitera cu nan tin un plan preliminario pa sigui discuti cu gobierno.
E experto a splica cu tin tres escenario cu gobierno por scoge dependiendo di e ambicion di gobierno.
“E prome escenario ta ‘Business as usual’, kiermen sigui haci loke bo ta haci. E di dos ta, bo ta bay cu un reforma anto gran parti di e reformanan aki tambe ta hinca den e Landspakket, of un gobierno cu ta bay cu un ambicion inter- generacional, cu ta bay pa transformacion. Pues bo ta kies pa e escenario ey”, Director di Banco Central a subraya, agregando cu esaki ta nifica un desaroyo economico pa nos tur. El a subraya cu e plan cu nan a presenta na Formador ta completamente nobo y diferente na añanan anterior.
Jane Semeleer a splica un poco tocante e tres escenarionan cu el a menciona, indicando cu por ehemplo un gobierno transforma ta diferente na con e ta organiza aworaki. “Bo ta bay haya un gobierno cu talentonan den dje cu ta fungi riba diferente tereno y nan no ta mara na ningun lugar.
El a splica cu tin diferente aspecto, por ehemplo den desaroyo economico, educacion financiero unda BC tin aworaki un programa dirigi na mucha di 5de cu 6de klas cu yama “Global Money Week”, pasobra educacion financiero mester wordo hinca den onderwijs, unda cu tur hende haya conocimento financiero. “Mi ta kere cu esey lo duna nos mucha mas instrument pa ta financieramente independiente”, Semeleer a acentua.
El a agrega cu pa yega eynan mester tin full un trayectoria di educacion cu ta diferente cu esun cu tin aworaki. Esey ta un ehemplo di transformacion.
“Business as usual” el a reitera ta cu gobierno ta keda haci locual ta haciendo aworaki, por ehemplo reforma belasting di acuerdo cu loke Hulanda ta bisa cu bo tin cu haci. “Pero e por bay mas leu cu e parti di transformacion unda cu no gobierno so, pero nos tur ta financieramente independiente”, el a reitera.
Encuanto e plan inter-generacional Jane Semeleer a splica ta ora ta “make sure” di tin un desaroyo economico no basa riba crecemento so, cu no tur ora ta bay contra naturaleza of nos bienestar. “Esaki ta parti di transformacion; un pensamento diferente” Jane Semeleer a indica.
