Dr. Yuri Cassares Medisch Manager di Clinica di Herida:
*E caminda pa evita ta prevencion
ORANJESTAD (AAN) – Den conferencia di prensa cu a tuma lugar na Hospital Dr. Horacio Oduber, docter Jury Casseres a expresa palabranan di gratitud na Minister di Salud Dangui Oduber, cu a tuma su invitacion pa bishita un seccion di cual tur hende na Hospital ta sinti hopi orguyoso di dje, esta “E clinica di herida”.
Casseres a comenta cu na aña 2014 ora el a bin Hospital y a bira e “Medisch Manager” di Wonden Poli, el a cambia su nomber pa “Center of Advanced Wond Care” y nan a cambie pasobra esaki ta bisa mas, kico nan ta haci précis.
“Pasobra nos no ta trata heridanan chikito so, pero eigenlijk heridanan avanza, heridanan cronico. Y bo ta wak den e añanan cu e cuido a bira mas avanza y e cantidad di pashentnan cu nos ta trata ta birando mas halto”, docter Casseres a splica.
E specialista a indica cu el a bisa e Minister cu si esaki ta sigui asina, enberdad aki poco aña lo bay wak casi 25 mil consulta pa aña.
E “Centro pa cuido avanza di herida” ta ubica na Hospital, pero nan tin un dependance na ImSan tambe, unda nan ta haya e pashentnan di pariba, caminda nan ta haya e mesun cuido dedica cu ta duna na wonden poli, na HOH.
Casseres a menciona tambe cu nan tin dos consulent specializa, pa e pashentnan cu ta drumi na Hospital dr. Horacio Oduber.
“Mi ta hopi orguyoso di nos team y di locual nos ta logrando akinan. Nos no ta cla ainda, pasobra locual cu nos kier ta pa nos por preveni tur amputacion. Nos sa cu pashentnan cu Diabetes tin un riesgo grandi di amputa desde un dede y hasta te un pia”, e specialista a subraya.
El a señala cu na mundo, cada 10 seconde un pia ta wordo amputa. Na Aruba tambe por wak cu tin hopi amputacion y ta pesey, manera e minister a bisa, e caminda ta prevencion. “Eynan nos ta bay scapa pia. Nos por haci nos best di por trata heridanan, pero e prevencion pa bo no haya un herida t’esey ta importante; pasobra un bez cu bo haya un herida, ora bo ta diabetico, e chens ta asina grandi cu bo por perde no un dede so pero un pia, y si bo perde un pia, bo expectativa di bida ta bira hopi menos”, Casseres a remarca.
“Nos, y ami por bisa esey di curazon, ta eigenlijk kier scapa tur pia. Tin pashentnan no ta wak’e asina, pero nan ta bisa ‘na Hospital nan a corta mi pia’. Pero door di miedo nan ta bin laat, pero kere mi cu full nos team kier scapa e pianan. Tin biaha no ta logra, of tin biaha tin cu kita un dede pa scapa un pia, of kita un pia pa scapa un bida, pero tin Diabetes y tin un herida, ya caba esey ta pone cu e chens pa perde un pia ta hopi grandi”, Dr. Casseres a reitera.
