Ayudo Hulandes ta yuda Aruba sobrevivi y ainda Covid-19 ta menasa - *Subsidio di Gobierno a yuda Comercio cu Covid-19 a paralisa - *40 hora di trabou ta exigi mas trahador cu Comercio no por paga
ORANJESTAD(AAN)—Na 2020, Aruba y henter mundo a ricibi un shock.
E malesa mortal Covid-19 a haci cu mester a cera economia di e pais.
Aruba no por a ricibi turista. Hotelnan mester a cera nan porta. Negoshi grandi y chikito a wordo paralisa hunto cu servicionan di Gobierno.
E efecto di Covid-19 tabata pio cu Segundo Guera Mundial. No tabata un asunto di core pa bo bida pero mas bien un asunto di pone un punto final pa bida normal.
Ora economia di Aruba a cera su porta, turistanan mester a bay nan cas. Negoshinan tambe mester a manda empleadonan cas pa un gran mayoria y negoshi cu a keda habri tabata pa loke ta vital pa comunidad.
Cu excepcion di algun sector, mundo comercial a bay suela y ta Gobierno a yuda mundo comercial tene su trahadonan na trabou ya cu no tabata tin entrada mas.
Te awe Aruba no por papia di un situacion normal y sigur no por tuma pasonan cu resultado pisa sin e certidumbre kico futuro lo trece pa Aruba.
Na e momentonan aki, Covid-19 ta keda un menasa cu tanto e accion di vacunacion como medidanan cu ainda ta vigente, a baha. Sinembargo, rond mundo Covid-19 ta un menasa ainda y cada dia cu pasa cientificonan ta haya mas informacion di peligernan.
Mundo sigur no a recupera e sla fatal di Covid-19 y rond mundo trahadornan mester a bay of ainda ta wordo manda cas mientras cu ainda produccion mundial no ta normal.
Produccion di hopi articulo a wordo tranca. Mundo comercial internacional ta wordo confronta cu situacionnan serio. Gobierno na diferente pais democratico a yuda nan empresanan cubri nan gastonan basico pero semper tin gasto cu nan mes mester a paga y no por paga.
Gastonan mundialmente ta aumenta. Produccion a bira mucho mas caro. Transportacion ta sufri y ta sigui sufri di Covid-19.
Aruba como un pais cu mester importa mayoria di su articulonan, sigur ta wordo afecta dor di e situacion internacional.
Aruba por a sobrevivi a base di un bon maneho pero nos mester ta realistico y acepta cu si Hulanda no por a yuda cu material, cu asistencia tecnico, cu personal, cu asistencia financiero, Aruba lo tabata den desaster social total.
Kico desaster total ta, por mira na e pais comunista Cuba, cu sigur no ta permiti ningun sindicalista of trahado pidi un pan mas cu gobierno.
Ta lamentabel cu sindicalistanan cu ta ricibi placa di contribucion di trahadonan y ta den servicio di trahadornan, den e situacion actual ta crea e impresion cu Aruba por bay 40 hora di trabou, loke ta nifica cu empresarionan mester tuma mas hende na trabou den un situacion cu hopi ainda mester mira con nan ta paga gastonan cu a keda atras.
Ta bon pa realisa cuanto negoshi rond mundo ta cera nan porta pasobra nan a bati bancarota. Paisnan grandi cu ademas ta produci cuminda pa nan hendenan no ta entrega ni trahador ni otro instancia promesanan cu ta dificil pa nan cumpli.
Pa Aruba recupera, e no mester di dirigentenan den ningun gremio cu kier score, pero e mester di lidernan cu na forma honesto ta splica nan kico por y loke no por pa asina Aruba traha riba su recuperacion pa entrega futuro generacionnan un pais, un mundo, cu mester a confronta e shock di Covid-19 cu ainda no ta brinda ningun speransa na ningun hende, ningun gobierno, ningun empresa, ningun sindicato.
