ORANJESTAD (AAN) – Norman Kuiperi, miembro di e directiva di Fundacion Parke Nacional Aruba (Parke Arikok), a participa den e conferencia di prensa unda el a duna su impresion relaciona cu FPNA su reunion cu Formador di Gobierno nobo, Evelyn Wever-Croes.
Norman Kuiperi a bisa, na prome lugar, cu nan a expresa nan gratitud pa e invitacion, y a splica Formador kico Parke Nacional Aruba ta para pe.
Esaki ta, entre otro, proteccion di e naturaleza y tambe di e biodiversidad cu tin den e ecosistema rond di Aruba.
“Tambe nos a hala atencion riba e diferente areanan cu nos no a haya bao e parke su maneho, y nos a trece dilanti e importancia di e naturaleza pa cu e economia di Aruba.
Awendia, e tendencia di turistanan ta pa nan busca un pais unda nan bay pasa vacacion unda cu e pais ta cuida su naturaleza: ta cuida su lama, su biodiversidad, nan sistema ecologico y tambe kier wak con e pueblo ta reacciona y trata tur loke tin di haber cu naturaleza di Aruba. Tambe e parti di lama cu ta e Parke Marino cu FPNA ta trahando un plan estrategico riba dje, aworaki.
Mi tin cu bisa cu e reunion a bay hopi bon, nos a haya hopi pregunta y tambe nos por a haya chens un rato pa splica, contrario na loke a sali aña pasa, varios biaha den prensa, FPNA su situacion financiero ta solido. Nos ta contento cu e maneho cu nos a hiba, e plannan y e pasonan cu nos a tuma pa mitiga e pandemia (e crisis di Covid-19), e no ta facil pero nos ta saliendo for di dje y nos ta kedando vigente, pasobra nos no a sali ainda for di e pandemia of e crisis”, Kuiperi a menciona.
El a expresa cu nan ta contento di wak cu hopi turista ta biniendo bek Aruba, y e ta spera di tende bek di Gobierno, un bez cu e ta forma, cu FPNA por sigui cu e combersacionnan tocante e balor di naturaleza pa Aruba.
