Un otro webinar exitoso organisa pa IDEA pa nos hende muher

ORANJESTAD (AAN): Departamento di Asuntonan Economico, Comercio y Industria (DEACI) mediante su division Iniciativa pa Desaroyo di Empresa Arubano (IDEA) cu colaboracion di Vadavas Jewerly, Accessories & More,

a organisa su di tercer webinar di Women Entrepreneurship cu e topico di “Aspiring Women Entrepreneurship” riba 10 di november ultimo.

Durante aña IDEA cu colaboracion di Erasmus Consulting & Training y ActionCOACH a orgranisa dos webinar pa e grupo femenino. E webinarnan ta specialmente dedica na e grupo aki cu ta desea flexibilidad den nan bida, cu ta desea di sigui nan pasion, cu kier tin mas control riba nan futuro y ta desea di crece mas rapido den nan carera. 

E di tres webinar tabata tin diferente tips valioso. Valeria Gomez, presentadora di e webinar, a menciona pa no busca excuus pa cuminsa bo negoshi y kere den bo idea y bo soño. Idea y soño ta algo cu e persona tin den su mes y mester kere den dje y haci’e un realidad. Hopi biaha e excuus ta stroba pa ta exitoso den futuro.

Tur cos tin nan proceso pa na final por ta exitoso. Valeria ta un empresario femenino joven di 24 aña di edad y ta stima e mundo di Entrepreneurship y ta explorando awor den mercado exterior. E ta un joven empresario cu a pasa den diferente experiencia y semper ta habri pa comparti esaki cu otro. Su presentacion sigur a inspira hopi di nos participantenan y por a scucha esaki tambe na final di e webinar mediante e feedbacknan ricibi.

IDEA lo sigui organisa mas webinar cu enfoke riba Women Entrepreneurship (WE). E webinar aki a tuma luga via plataforma digital y a haya un participacion di en total 31 persona femenino.

IDEA lo sigui cu su webinarnan den 2022 cu ta bay ta dedica na un y tur cu kier cuminsa un negoshi of tin un negoshi existente y kier educa nan mes riba diferente topiconan comercial. Un danki na tur e participantenan femenino y un danki special na Valeria Gomez cu a comparti su experticio cu tur esnan cu a join e webinar. Keda pendiente pa mas eventonan den aña 2022 cu IDEA lo organisa.