Pueblo ta haya falta di ‘Ceramento di Aña cu Roberto’
ORANJESTAD (AAN) Tabata e fecha di 17 Januari 2022 cu publico a haya shock, cu e conocido locutor Roberto Geerman a fayece.
Esey ta e Roberto Geerman, kende pa varios lustro ta cera aña na radioemisora manera Canal 90, y ultimo e tabata haci esey na Galactica FM.
E programa ta yama “Ceramento di Aña” cu Roberto. Y manera cu Roberto a yega di relata, tur cos a cuminza pa casualidad, pues nada planifica y prepara. E tradicion na Aruba ta pa habri aña den un ambiente familiar unda tur hende ta na cas, bay pafo ora e klapchinan ta sona y warda ora Dande ta yega na cas. E ta un tradicion cu mester keda mantene pa tur e generacionnan.
Pero no ta esaki e origen di e programa. Roberto a conta cu na aña 1978 el a perde un ruman, y na aña 1979 el a cuminza traha na radio. E tempo ey na Radio Antiyana na 1270 AM. Eynan a worde puntra ken ta dispuesto pa cera aña y el a bisa cu e ta haci’e, sin sa cu e momento ey a bira e fundeshi pa un caminda largo cu ta parti di Aruba su tradicion.
Hendenan a keda pendiente pe, y e ta hacie di 11’or di anochi pa 1’or di madruga. Despues di Radio Antiyana el a bay pa Canal 90 y su programa tabata despues cu Ruben Garcia tabata caba cu e top 100, pero e no tabata mara na ora. Tin biaha e tabata caba 11.45 pm anto e tabata haya chens pa presenta ceramento di aña.
Na su salida di Canal 90 el a bay Galactica, cu tin e tradicion di presenta su top dia 30, pues bispo di final di aña. Aki el a tume pa cuminza pa 9 or di mainta. E ora ey ta cuminza pone ambiente di fin di aña y realiza loke e kier a haci tur e añanan prome pero cu e no a logra pa motibo cu e tempo tabata mucho cortico.
E idea tabata pa tin contacto cu Arubianonan unda cu nan ta rond mundo. E mes ta cumpra carchinan di telefon pa e por yama y drenta den contacto cu nos hendenan den exterior. Ultimo temponan e no tin nodi yama pasobra Arubianonan mes ta yame for di diferente pais, por ehemplo desde Australia, Qatar, Indonesia, y claramente Hulanda.
Sr. Geerman a expresa cu esaki ta mustra con e sentimento di familiaridad entre nos hendenan ta y e programa ta e vinculo cu ta haci posible e bunita contacto aki.
E cabayero a indica tambe cu e tecnologia a trece un cambio grandi unda un hende ta start un video-chat via computer, tablet, of via smartphone mes ta wak su hendenan na otro banda di mundo y combersa manera nada.
Pero na e decadanan 80-90 nos no tabata tin e tecnologia aki. Hendenan tabata graba den cassette y tabata pidi sr. Geerman pa pase via radio pa muchanan na e otro banda scucha y asina tin e contacto.
Un persona na trabao mes por yama radio y manda un saludo na cas pa esnan cu ta sintie cerca, maske cu nan no ta cerca di otro. Asina e conteo di Fin di Aña a cuminza cu Roberto na Galactica.
Si ta asina cu Roberto mes no por disfruta cu ceramento di aña cu su famia. Ora el a yega 25 aña cu e programa el a bisa cu esaki ta su ultimo aña... E berdadero final a socede 43 aña total... te ora Todopoderoso a yama busk’e.
Nos lo sigui haya falta di Roberto. Sigui sosega trankil asina.
