Avestruz lo bira un bofta den cara di idealismo politico
*Traspaso entre compania mester cubri benta di suelo di Aruba
*E sabor hopi amargo den loke parce fiesta di family and friends
ORANJESTAD(AAN)—E caso avestruz por bira un bofta den cara di idealismo politico, cu a kere cu si politiconan den Gobierno ta personanan profesional capaz, tin mas chens cu Aruba lo conoce progreso y bienestar.
Den e caso Avestruz, nomber di Mike Eman no a aparece como testigo pa Pueblo scucha un parti sumamente importante di e escandalo cu den cada capitulo den sala di Corte, ta duna mas motibo di berguensa.
Mike Eman tabata Prome Ministro di e dos gabinetenan den cual Benny Sevinger tabata Ministro encarga cu tereno.
Benny Sevinger, manera semper Mike Eman mes a trece dilanti, ta e “back to back” di Mike Eman, cu segun te awe mester asumi den e caso penal Avestruz, tabata goberna cu wowo cera pa su ambiente mas cercano.
Si sigui e acusacionnan, e acusadonan y tur aspecto cu ta bini dilanti den e caso Avestruz, nos bista ta keda concentra riba un pregunta clave: Mike como Ministro Presidente di Aruba, como lider di AVP, como amigo personal di Benny Sevinger y di tanto acusado, no a ripara cu algo tabata completamente robez den dunamento di tereno durante un temporada demasiado largo?
Pueblo a vota pa Mike Eman como persona cu tabata brasa y sunchi, pero ta hopi sabi pasobra su profesion ta Notario.
Pueblo a mira den Mike Eman, brasa, sunchi pero tambe un persona cu lo por a uza su conocemento personal pa asina percura pa semper bienestar di Aruba wordo sirbi.
Ora nos lesa rapport Bo Aruba, den cual Benny Sevinger y Mike Eman tabata e dos personanan directamente encarga cu decisionnan clave cu ta mishi cu tereno y permisonan pa proyecto, nos a busca tambe e papel di e profesional cu a laga un herencia di desaster atras pa Aruba.
Den sala di Corte di Aruba awor por scucha e acusacion cu terenonan cu a wordo haya den erfpacht lo a wordo bende na un hopi bon prijs cu personanan sumamente yega na AVP, Benny Sevinger y Mike Eman.
Como parti di negoshi di family and friends di e grupo di Mike Eman, di cual Benny Sevinger como AVP a bay forma parti ora Watty Vos a muri, lo tabata tin un acusado cu tabata haya erfpacht na hopi bon lugar na Aruba pa realisa proyecto.
E persona aki tabata bende e proyecto y asina cu e proyecto e tereno cu el a haya den erfpacht, loke ta nifica cu indirectamente erfpacht por a bira negoshi.
Mike Eman a wordo eligi como dirigente di Aruba pa su brasa, su sunchi pero tambe pasobra Aruba a mira su titulo profesional como Notario.
Pues Pueblo a mira den Mike tambe uno di e profesionalnan mas importante den asunto di tereno y traspaso di propiedad.
Prome cu Mike a bay dedica su mes na politica, e tabata traha como candidato pa Notario.
Con Benny Sevinger y otronan, si tur acusacion den caso Avestruz ta berdad, a logra mantene tur loke awe ta acusacionnan for di bista di Mike Eman? Nunca Benny Sevinger no a puntra Mike pa su opinion den asuntonan cu Mike Eman como profesional por a asisti Benny Sevinger cu tabata miembro di su Gobierno?
Den su palabranan di defensa, Benny Sevinger a trece cierto informacionnan dilanti. Prome cu e caso a drenta sala di Corte for di e campo di Benny Sevinger, di su abogado por a scucha cu “algo a pasa” pero cu Benny Sevinger ta inocente den e acusacionnan den cual Benny lo a mira su mes como victima pa motibo di su buena fe den hende..
Awe pregunta serio ta ocupa nos atencion.
Den Mike Eman, Aruba a mira un profesional den asuntonan cu ta atende cu tereno, den cual pues tin un lugar directo pa e profesion di Notario.
E rapport “Bo Aruba” ya a pone nos haci cierto pregunta ora tene na cuenta cuanto asunto tabata tin necesidad di conocemento di regla den asuntonan di tereno y proyecto.
Den e caso di Avestruz, nos ta tende di abogado, huez, testigo, acusado, etc. etc. nos no ta tende di Mike como Prome Ministro, dirigente di e Gobierno den cual Benny Sevinger tabata Ministro.
Den e caso di Avestruz, nos ta mira acusacionnan contra un Ministro di asuntonan di Tereno den un Gobierno dirigi pa un profesional legal cu ex Prome Ministro Mike Eman ta.
Kico e caso lo duna como resultado pa expertonan cu aspiracion pa bira politico?
Pa un conclusion pa nos analisis riba desaroyonan te awor, nos mester sigui scucha y analisa tur loke lo bini dilanti den un caso historico.
