Na inicio di un aña escolar y final di e temporada di vacacion na hopi pais - No por tin un base solido pa economia si empresa y trahado ta na peliger - Awe Covid-19 ta menasa e parti hubenil di e forsa laboral mundial
ORANJESTAD(AAN)- Planificacion mundial tabata, pa na e momentonan aki mundo alcansa un normal nobo. Un normal cu mester tabata basa riba mantencion di medidanan preventivo di e coronavirus nobo.
Mundo a faya y awe mundo ta na careda den un intento pa scapa su economia di un caida sumamente grandi.
Segun a wordo pensa na 2020, na e momentonan aki, mundo mester tabata recuperando di e efecto di e pandemia na 2020. Mundo a cuminsa recupera pero mundo no a tene na consideracion cu tin diferencia importante entre e menasa na 2020 y na 2021.
Uno di e aspectonan di e tercer ola cu no ta haya suficiente atencion, ta e hecho cu e coronavirus nobo ta menasa e grupo di hobennan cu den e prome atakenan di e malesa, a considera cu nan ta for di peliger.
Na 2020 a bati alarma cerca hende di edad mas halto pero no tabata tin mucho atencion pa e peliger pa hobennan cu no tabata sufri di cierto condicionnan medico cu ta aliado di Covid-19.
Awe algo diferente ta tuma luga y ta un menasa pza e grupo cu pa su edad, ta sumamente importante den e produccion economico mundial, cu ta hende di e edad mas hoben cu ta incorpora den economia mundial.
Hustamente den e temporada cu segun a wordo calcula, un generacion nobo lo a reemplasa hende di mas edad den mundo empresarial y laboral, un variante cu ta dirigi su mes riba hobennan cu velocidad halto, a presenta.
Morto y malesa ta wordo sembra cerca e loke mester bira base di economia, base di e forsa laboral y empresarial den e temporada cu un generacion ta retira pa traha lugar pa otro.
E generacion hoben tabata hustamente e generacion cu mas a nenga di mira e peliger di e virus y a mira su mes como mas poderoso enfrente un peliger mortal.
Na momento cu un variante mishi cu e gruponan mas hoben den comunidad, e ta mishi cu un parti grandi di e grupo di poblacion pues cu ta encarga na un forma special cu e produccion economico di e pais tanto den sector laboral como den sector economico.
Mester comprende cu no por tin un base solido pa econnomia si e base di produccion ta wordo afecta.
Mundo ta wordo silencia atrobe y un malesa ta exigi sentido di responsabilidad cu no ta permiti exigencianan material cu despues lo tin un efecto mucho mas grandi riba awe kier mira como logro material na mundo.
Awe medidanan concreto mester bira exigente pa defende hende contra su mes. Awe e ehempel di paisnan cu ta cera porta pa hende cu no kier vacuna y ta exigi trahadornan pa vacuna, mester wordo sigui.
Augustus a bati na porta.
E hemisferia Norte ta bolbe di vacacion. Muchanan mester bolbe school.
Mundo mester acepta cu el a faya den su pronostico cu awe tin un normal, cu no por existi mientras un cantidad importante di empresa y forsa laboral ainda ta tranca dor di Covid-19.
Aruba y henter mundo ta bolbe na medida. Varios pais a cuminsa ta cera nan porta pa gruponan cu no ta vacuna. Hopi cu a bringa e medidanan di 2020 awe ta admiti, cu despues di tanto sacrificio mester enfrenta e malesa cu e arma mas importante, cu ta exigencia pa hende proteha nan mes y asina proteha comunidad, cu mester sanciona egoismo, e aliado di Covid-19.
