ORANJESTAD (AAN) – Den conferencia di prensa relaciona cu e reunionnan entre Formador Evelyn Wever-Croes y e stakeholders, señora Jeannette Richardson- Baars, Coordinador di “Coordinatiecentrum Mensenhandel Messensmokkel Aruba” (CmmA), a brinda un relato respecto e reunion aki.
Jeannette Baars a atende e reunion cu Formador hunto cu su colega, Lider di Proyecto, Angela Persad. E encuentro a bay hopi bon, el a indica, y nan ta hopi contento cu a haya tempo pa splica kico CmmA ta haciendo, y di con e ta importante pa continuidad di nan trabaonan den e siguiente añanan.
Richardson-Baars a menciona cu un di e aspectonan mas importante aworaki ta pa CmmA wordo formaliza den Gobierno di Aruba, pa nan por traha nan presupuesto, entre otro, pa por sigui desaroya nan trabao.
“Nos a splica nan kico nos ta haciendo y pa pueblo por ta bon pa sa cu Coordinatiecentrum ta manera e locket unda tur informacion cu hendenan por tin na Aruba, por yama nos, manda nos un e-mail, puntra pa informacion; pero tambe rapport casonan unda nan ta pensa cu hendenan por ta ocupa den traficacion di hende. Nos a haya un bon impresion di Minpres y di e otronan presente y cu nan a compronde kico nos ta puntra pe, pa nos wordo formaliza pa haya budget pa nos haci nos trabao”, Jeannette Baars, Coordinador di CmmA a reitera.
Richardson-Baars a indica cu CmmA a cuminza na aña 2020. Aunke un luna despues Covid-19 a drenta Aruba, CmmA a sigui cu su trabao y nan a yega aworaki na e punto cu nan ta determina cu nan tin tres area di trabao cu ta: Informacion, educacion y asistencia.
“Informacion ta manera mi a bisa cu nos ta e loket cu hendenan por yama, puntra pa informacion, of haci un melding; educacion, cu e campaña cu nos a haci e aña aki ‘www.abri bo wowo.com’ bo ta haya tur informacion; y asistencia ta e plannan cu nos ta trahando riba dje pa bin cu un shelter, specificamente pa e victimanan di traficacion di hende. Riba esey nos a elabora den nos meeting y a puntra pa, ora nos wordo formaliza y nos haya un begroting, nos por realiza tur e puntonan ey”, Jeannette Richardson- Baars a señala.
El a agrega cu e shelter mester a cuminza caba y e sa cu nan ta bezig cune. “Nos ta spera cu prome cu fin di aña, tur e puntonan cu nos a pidi awe lo por a wordo realiza.
E dama a añadi cu ta importante pa sa cu Aruba ta un tiki diferente na e paisnan cu tin frontera terestre. “Aruba ta rondona door di awa y esey kiermen cu pa nos, contrabando y traficacion di hende ta hopi conecta cu otro. Si nos por stop contrabando di hende tambe nos por stop traficacion di hende pasobra esaki ta explotacion”.
Jeannette Baars ta haya cu Aruba ta bayendo den bon direccion y cu CmmA nan tin un tool nan por tey pa tur e otro puntonan cu no ta investigacion y e trabao di OM cu ta persigui y condena hende.
“Nos como CmmA ta haci tur e otro partinan, pa nos por zorg cu e problema di contrabando y traficacion di hende ta bon poni y cu nos tin solucion pa tur cos”, Jeannette Richardson-Baar, Coordinador di CmmA, a conclui.
