Un meta cu directiva nobo tin ta pa dokternan di cas traha hunto den mesun direccion

Presidente nobo di HAVA, Maribelle Tromp:

ORANJESTAD (AAN)-- Matutino DIARIO a entrevista e Presidente Nobo di e Asociacion di Dokternan di Cas (HAVA), Epidemiologist drs. Maribelle Tromp, ken a expresa cu HAVA ta continuando cu su “retonan”

pero cu un directiva completamente nobo, despues di basta tempo.

“Mi no ta yama nan ‘reto’, al contrario mi ta yama trabaonan cu nos mester sigui cu nan, y un di e puntonan cu nos ta bay concentra riba dje, como HAVA eigenlijk ta pa nos dokternan di cas ta hunto, pa nos tur traha den mesun direccion”, Maribelle Tromp a comenta.

El a agrega cu nan ta sinti cu pa añanan esey no tabata e caso internamente, y awo, como Bestuur nobo nan kier logra pa nan para hunto cu e mesun obhetivonan, pa logra un calidad di cuido halto pa nan pashentnan na Aruba. Drs.Tromp a señala cu tin un variacion grandi na dokternan, y HAVA tin un total di 72 miembro, cual cu ta inclui no solamente e dokternan pero tambe dokternan cu ta traha pa Hoed, esnan cu ta haya opleiding pa specializa nan mes como dokternan di cas na Aruba, entre otro, y tur tin cu traha hunto.

“Y den esey nos kier crea un harmonia, un standardizacion con e trabaonan ta wordo haci. Con nos ta bin cu reglamento, protocol, cu tur  ta cu cumpli cu ne p’asina hisa e calidad di cuido cu e pashent ta haya na momento cu e yega cerca e dokter”, Presidente di HAVA, drs. Maribelle Tromp a subraya.