ORANJESTAD (AAN): Prome Minister Evelyn Wever-Croes a bisa dialuna mainta durante e rueda di prensa di gobierno cu Aruba a pasa den dos suceso cu a shock comunidad.
Un di nan tabata e fayecimento di un baby y pa cu esaki a remarca cu e compromiso ta keda pa mantene e crèchenan como lugarnan mas safe cu ta posibel, sinembargo "tin biaha Dios ta dicidi diferente", a expresa.
Tambe tabata tin e accidente tragico cu a conduci na fayecimento di e hoben turista di 13 aña. "E situacion aki naturalmente ta trece hopi tristesa cu ne pero mesun momento ta algo hopi serio pa nos akinan na Aruba".
E mandatario a laga sa c'un investigacion profundo ta andando y Ministerio Publico como Polis Maritimo ta atendiendo cu e investigacion aki. Ora cu tin mas informacion lo bin cu mas detaye, a bisa.
Despues lo reuni cu mas autoridadnan cu ta atende cu e tema aki di 'watersport' pa asina mira si tin algo cu ta sali den e investigacion cu mester wordo cambia, Premier Wever-Croes a indica.
Pa awor e ta haci un apelacion riba tur esnan cu ta haci e tipo di trabaonan aki pa ta extra cauteloso. "E no por ta business as usual mas. Akinan ta mustra cuanto responsabilidad nos cada un ta carga pa nos por hiba nos pais pa dilanti".
E mandatario a laga sa cu el a pasa cerca e mayornan prome cu nan a subi avion pa bandona Aruba den fin di siman. Nan ta hopi kibra y desconsola. "Sinembargo hopi agradecido cu e sosten cu nan a haya di varios persona aki na Aruba".
