Un grupo di adultonan mayor a wordo honra cu un comemento hopi agradabel

ORANJESTAD (AAN) – E dama comerciante Luz Adriana Santana, doño di un cafeteria, den entrevista cu DIARIO,

a duna di conoce cu luna pasa e tabata hunto cu su team a hiba un campaña den e Iglesia cu e ta bishita, pa honra e hendenan grandi. El a dicidi di busca un cas di cuido di nos grandinan pa duna nan un muestra di cariño.

Luz Adriana ta doño di un lugar di cuminda, y el a keda hopi contento pasobra e cas di cuido a deposita su confianza den dje, y diez persona di edad grandi a disfruta di un comemento, acompaña pa musica.

El a bisa cu e ta masha contento tambe pasobra tin algun di e grandinan cu tin hopi tempo sin sali for di e lugar di cuido. Luz Adriana a expresa cu e kier motiva tur comerciante y pueblo di Aruba henter, pa corda di e grandinan no solamente den e temporada di Pasco pero durante henter aña.

El a bisa cu hendenan grandi ta wordo laga un banda y esey no ta bon pasobra tur hende un dia ta yega na edad grandi, y mester percura pa nan.

El a bisa cu intencion ta pa otro aña haci esaki atrobe y sigui cu ne, unda e ta bay adopta un par di cas di cuido, of fundacion, di nos grandinan pa duna nan un tempo di calidad y pa nan experiencia un lugar fresco agradable pa sali tuma un coffie of come, pasobra e grandinan ainda ta parti di e sociedad.