ORANJESTAD (AAN) – Den conferencia di prensa di fraccion di MEP, cu a tuma lugar na Caya Principal na San Nicolas, Parlamentari Arthur Vallejo a elabora riba e tema di fusion di Hospital dr. Horacio Oduber y Instituto Medico San Nicolas (HOH-ImSam).
E parlamentario a mustra su desacuerdo riba un posible fusion entre ambos institucion, cu e idea cu esaki por baha e costonan di salud. Asina por lesa den un prome articulo.
E parlamentario a agrega cu San Nicolas tin mas di 25 aña ta pidi pa un Hospital. Un fusion por implica cu, por ehemplo, ta tuma decisionnan y bisa cu debi na e rapport di presupuesto den salud, similar na esun cu nos ta experenciando awo den recorte di 60 miyon, cu Aruba ta mucho chikito pa dos servicio di eerste hulp; cu, cu un mes ta bon y lo cera sigur esun di ImSan, prome.
“Estudionan ta mustra cu ora Institucionnan ta haci fusion, esun di mas chikito ta perde personal, cama y departamento. Kico ta bay pasa cu e trayectoria cu a costa Aruba miyones caba pa cu e acreditacion JCIA (Joint Commission International Accreditation) pa ImSan, cu den un par di luna lo bira un realidad?”, Parlamentario Arthur Vallejo ta puntra, indicando cu door di un fusion, ImSan lo perde esaki, pasobra HOH ta leu di ta un institucion acredita pa DCIA. “Aki miyones di florin di pueblo, lo bay perdi. DCIA Acreditation ta importante pa asegura calidad di cuido, y sigur ta duna realze na e producto di Aruba, ora cu e turistanan sa cu Aruba ta conta cu institucionnan cu acreditacionnan asina halto. Mester corda cu awo San Nicolas ta bay haya un hotel di bon caliber y bon sentido, na unda cu lo ta importante pa tin institucionnan di cuido cerca di hotel, pa brinda e garantia di salud pa e turistanan”, Arthur Vallejo a subraya.
Tin hende cu a pensa riba e distancia entre ambos centro di salud, y ta puntra: “con dos hospital asina leu di otro por wordo maneha, si e bira dependiente di uno?” E parlamentario a señala cu e trabao di maneho di un hospital ta uno arduo. Un trabao di tur dia, presente y den e rol pa mehora e edificio, y costonan di mantenimento basico, sin menciona e trabao di e team medico puntrando con a bay? Y kico tur nan mester diariamente; a pensa riba e ekiponan di trabao profesional? E parlamentario ta referi na docternan, enfermeria, etc. E institucionnan aki, e ta agrega, tin teamnan di hende ya caba forma cu sa con pa yuda otro y den ki forma. “Esaki ta e magia di cada Institucion”, Vallejo a expresa.
“Ora bin fusion esaki ta mix y e ta nifica cu ta bay tin rotacion di personal, di forma natural, kibrando e trabao conoci den team. E ta kibra e magia di e institucion!” Vallejo a reitera.
