Un espacio pa nos adultonan mayor sinti nan mes cerca di otro

Centro di Bario Dakota

ORANJESTAD (AAN): Durante su recien bishita na Centro di Bario y Deporte Dakota como parti di Accion di Bario, Prome Minister Mike Eman a comparti un momento cu miembronan di Club Flor di Aloe, un grupo cu ya pa alrededor di 10 aña ta reuni Adultonan Mayor di comunidad.

   Stella Toppenberg, un di e personanan envolvi cu Flor di Aloe, a splica cu e grupo a nace cu un meta senciyo pero importante: saca adultonan mayor for di cas y crea un espacio caminda nan por reuni, socialisa y sinti nan mes parti di un famia.

   Actualmente Flor di Aloe tin alrededor di 50 miembro. Durante nan encuentronan, e miembronan ta comparti cu otro, papia, hari, baila y participa den diferente actividad.

  Segun Toppenberg, e balor di e grupo ta precisamente den e contacto humano cu e ta crea. Pa hopi adulto mayor, un grupo manera Flor di Aloe ta brinda oportunidad pa sali for di rutina diario, topa cu otro y keda activo socialmente.

Durante e encuentro, Premier Eman a dirigi palabra na e miembronan y a intercambia idea cu nan tocante importancia di e actividadnan y e funcion cu gruponan di adulto mayor tin den comunidad.

Toppenberg a expresa tambe satisfaccion cu e apoyo cu gruponan di 60+ ta ricibi pa yuda cu algun di nan gastonan, y a destaca importancia pa sigui sostene iniciativa cu ta mantene adultonan mayor activo y conecta.

   E encuentro cu Flor di Aloe a agrega un aspecto humano na Accion di Bario: un bario no ta solamente infrastructura y espacio fisico, sino tambe e relacion y actividadnan cu ta trece hende hunto.