Fundacion AMMF a responde den e caso aki
- Ta e especie Stenella attenuata
ORANJESTAD (AAN): Siman pasa, esta Diahuebs, 15 di januari 2026, Aruba Marine Mammal Foundation (AMMF) a responde na un caso di un dolfijn femenino juvenil morto na Mangel Halto, di e especie Stenella attenuata (Pantropical spotted dolphin).
El a wordo transporta cautelosamente pa un lugar sigur pa tuma documentacion, midimento morfometrico, haci necropsia y pa preservacion di e skelet pa estudio cientifico
Segun relato di testigonan, a observa tres dolfijn inicialmente, di cual uno tabata den e areanan poco hundo y tabata mustra señal di dificultad. Algun hende tabata landa cu e dolfijn y saca potret; el a wordo hiba tera ora el a muri, y na e momento ey a tuma contacto cu AMMF.
AMMF ta recorda publico pa ta consciente cu e awanan na Malmok, Palm Beach, Eagle Beach, Surfside, Southreef, Mangel Halto, y Roger’s Beach, inherentemente ta refugionan di emergencia pa dolfijn debilita. Pesey, mester cumpli estrictamente cu e codigo di conducta pa cu e encuentro cu mamiferonan marino.
Pues, corda cu e dolfijn no ta aparece den e areanan aki pa entretenimento humano, sino pa descansa y recupera di un condicion debilita, leu for di depredadornan (manera orca y tribon). Ta pidi landadornan y manehadornan di boto pa mantene un bon distancia for di dolfijn cu ta refugia; e miho cos pa haci ta evita e zona, sali for di awa, no mishi cu nan, y tuma contacto mesora cu AMMF (592-4333) pa asistencia di personanan entrena.
Un dolfijn den condicion debil (sea cu e ta agota, herida, malo, pariendo, of cu un cria recien naci)hopi biaha ta acompaña pa mas dolfijn cu ta dune apoyo, y rutinariamente nan ta busca refugio den e areanan aki. Stroba e dolfijn nan aki ta pone tanto nan supervivencia como bo mesun seguridad na peliger
Actividadnan manera landa cu e dolfijn por agota fisicamente e animal cu ya caba ta luchando; esaki tambe ta stroba comportacion natural y ta impedi e otro dolfijnnan di compañ’e y brinda yudansa. Tene un dolfijn of colga na dje ta stroba e animal di subi na superficie pa hala rosea. Ademas, forsa un dolfijn den condicion debilita for di awa poco hundo bek pa awa profundo prome cu el a recupera su forsa, por causa cu e animal ta hoga accidentalmente
Na Aruba ta prohibi pa pone e bienestar di dolfijn na riesgo, incluso causa estorbo den su descanso, segun e Decreto Nacional pa Proteccion di Flora y Fauna Indigena (AB 2017.48, Art. 1.b.3) y e Ordenansa di Naturalesa (AB 1995, No. 2, Arts. 4.1, 5, 6, 7). .
AMMF ta haci un suplica na publico pa yuda y uni cu proteccion di e dolfijnnan y nan refugionan. Nos ta extende nos sincero gratitud na tur cu ta apoya y colabora cu proteccion di mamiferonan marino di Aruba, y na e personanan cu a raporta, duna informacion, y asisti durante e incidente aki di e dolfijn Stenella attenuata na Mangel Halto, Aruba Conservation Foundation y Korps Poltie Aruba.
