Na New York e lo ricibi reconocimento door di Independent Press Award
ORANJESTAD (AAN): Autor Claudia Daher-Ponson, ken a presenta su prome novela ‘R.A.T.S Revolutionary Army of Teen – We Are One’, a comparti un primicia cu DIARIO: ya caba e ta skirbiendo e di dos buki di e serie inspirador aki.
‘R.A.T.S Revolutionary Army of Teen – We Are One’ ta hopi mas cu un storia di ciencia ficcion; e ta un obra dirigi na hoben, y a nace na 2013 ora Daher-Ponson a ripara cu muchanan ta pasa casi tur nan tempo cu telefon y computer den man, alehando nan di e balornan familiar y hincando nan mas y mas den bida digital. E fenomeno aki a inspir’e pa explora e consecuencia di biba den un sociedad superconecta, unda tecnologia ta competi cu cariño y respet pa mayor, welo y famia.
“Muchanan a cuminsa tin mas cariño pa computer cu pa nan mayornan, welonan y famia... y ta biba un bida digital. Nan ta drenta den mundo di computer y ta keda atrapa den storianan cu no ta existi. Ora mayornan ta intenta interveni, e muchanan no kier tende; computer sa mas, computer ta mas pret”, Daher a confesa.
Basa riba e observacionnan aki, y mirando tambe cu amigonan di su yiunan tabatin problema familiar y falta di respet pa nan mayornan, Claudia a tuma accion y a transforma su preocupacion den movimento. Asina a yega na e idea pa skirbi un obra inspira den un hoben ken e conoce personalmente: “Un mucha humilde, bondadoso, generoso, cu ta gusta studia y lesa; un persona presente cu ta yuda sin importa religion of clase social”.
Asina a cuminsa e storia, cu un protagonista Arubiano cu yama David y cu tin amistad online cu muchanan di hopi pais. E tin un welo cu a inventa un wega cu yama ‘R.A.T.S Revolutionary Army of Teens – We Are One’. E welo, pa test e wega cu el a inventa, el a dun’e na su nieto, kende a cuminsa hung’e cu muchanan di mundo henter.
Nan a forma un team, Claudia a splica. E wega tin di haber cu cambio climatico y hopi cos cu ta sosodiendo na mundo.
E buki ta inicia na Aruba na aña 2040 cu e muchanan hungando ‘beach tennis’ ora nan a ripara cu awa tabata bayendo aden bek den lama. Ora di bay cas y cende television nan a haya sa di hopi tragedia cu tabata sosodiendo manera horcan, teremoto, etc.
E mensahe di Claudia den e buki aki ta uno ehemplar: union y forsa sin importa religion, rasa, clase social. Den e wega, e muchanan ta hunga pa defende mundo y na mesun momento, nan ta defende mundo di ‘aliens’ cu por bin ataca y e ‘aliens’ aki ta e mesun ser humano cu ta destruyendo mundo. Pero loke e muchanan no sa ta cu e wega ta un training pa nan por defende e mundo aki.
‘R.A.T.S Revolutionary Army of Teen – We Are One’ ta un buki cu a wordo lansa mundialmente na final di 2024 door di un compania editor di renombre internacional, esta Pegasus Publishing London.
Na Aruba, a haci un bunita lansamento na diferente scol como tambe na Biblioteca Nacional Aruba y a haya un exitoso acogida.
Un primicia cu Claudia Daher-Ponsor a revela ta cu ya caba e ta trahando riba e di dos buki di e serie aki unda cu e adolescentenan ta realisa e importancia di unidad di tur pueblo y nacion.
El a laga sa cu den e di dos buki ta bay envolve Iglesia Catolico, arzobisponan y cu bendicion di Santo Papa, kende Claudia a bishita recientemente y a haya un ehemplar di su buki. Tambe ta bay tin un grupo di Musulman, Budista, Hindu y Hudio.
Den e di dos buki ta bay tin influencia directo di lidernan mundial di cada religion y nan ta bay expresa esey den personahenan adolescente.
Claudia Daher-Ponsor a finalisa bisando cu futuro di humanidad ta den man di cada persona y asina el a haci un invitacion pa comunidad pa lesa su buki y pa laga e hobennan di Aruba ricibi e mensahe valioso cu ta wordo comparti. “Mester combati maldad hunto pa medio di union y esaki ta cuminsa cu cada un di nos, cu ta esunnan mas grandi y cu mester ta un ehempel pa e muchanan. Pa laga nan biba den un mundo di paz, amor y prosperidad”.
E autor a duna di conoce cu ganashi di e buki lo bay pa Fundacion ‘We Are One’ conforma pa representantenan di diferente religion cu ta bay promove unidad y paz mundial.
Den luna di April, Claudia lo ta ricibiendo un reconocimento (Distinguished Favorite Independent Press Award) pa su buki den e categoria di “Science Fiction: Existential & Social Resilience”, na e ciudad di New York caminda lo tin envolvi diferente plataforma manera Fox News, Vogue Magazine, podcasters famoso. E dia ey e lo haya un premio cu e lo trece Aruba cu gran orguyo, el a bisa.
“Mi tin 35 aña na Aruba y Aruba ta un isla bendiciona y mi a wordo bendiciona door di Dios pa trece mi te akinan, cu hendenan cariñoso, amabel, servicial. Un pueblo cu semper ta dispuesto pa yuda”, Claudia a expresa.
