Tisa LaSorte, CEO di AHATA:
*AHATA ta sinti cu mester mehora!
ORANJESTAD (AAN) – Den entrevista cu Tisa LaSorte, el a señala cu un di e motibonan pa cual AHATA a papia cu Minister di Labor y Integracion, ta cu awo e ta e minister bao cual DIMAS y LABOR ta resorta, locual no tabata comun.
Esey ta un oportunidad pa haci e sistema mas eficiente, el a bisa. “Pero loke nos ta mira den practica, ta cu e sistema no a bira mas eficiente ainda. Corda cu un parti di e solucion (riba scarcedad di trahado) ta haya permiso di trabao. E ta un parti grandi di e solucion y eynan nos kier pa e sistema ta mas eficiente. No ta cu e sistema no ta existi cu e no ta eficiente, sino cu e ta tarda mucho. Ora un sistema asina tarda demasiado, laga nos bisa ocho of nuebe luna pa por haya un permiso pa un persona, por ehemplo pa un executive chef, e persona ey ta bay busca trabao na otro caminda. E no ta bay warda ocho luna pa e haya un trabao akinan; pues bo ta perde e candidato”, LaSorte a señala.
El a agrega cu e ora ey no por yena e vacature, e lugar no ta productivo, no por duna e servicio cu ta suppose mester duna e clientenan y esey tambe tin su efectonan negativo pa e compania y pa nos economia. “Dus, enberdad un di e problemanan mas grandi cu nos tin na Aruba ta e eficiencia y e colaboracion entre DPL y DIMAS cu nos ta sinti cu mester mehora, bira mas eficiente y mas automatico”, LaSorte a subraya.
El a referi tambe na e hecho cu tin dos hotel grandi cu ta bay habri pronto y esey ta ranca hende di e mercado di labor. “Nan tin necesidad grandi di trahado, of nan ta bay haya hende cu ta trahando otro caminda, anto esey ta bay afecta e companianan unda nan ta haya trahado for di dje. E ta crea un problema, un ola di consecuencia pa otro companianan tambe, esey ta loke nos ta mira”, Tisa LaSorte a comenta.
El a menciona cu AHATA a haci un sondeo pa wak, na 2024 so, di cuanto trabao tin habri na e hotelnan cu ta existi caba y contando tambe esnan cu lo habri fin di aña: E ta papia di 1500 trabao habri.
“Esey ta un cifra dinamico pasobra e ta cuminza yena algun, otro ta habri, pero e ta duna nos un idea di ki demanda tin pa trahado. Anto esey ta solamente den hotel, imagina e efecto cu esey tin riba otro companianan cu tambe falta hende y ta masha hopi compania tin cu mester hende”, CEO di AHATA a remarca.
