ORANJESTAD (AAN): Gobierno di Aruba pa medio di SDG Commissie Aruba den colaboracion cu Nacionnan Uni ta organizando un workshop riba e thema “Raising SDG Public Awareness”.
E workshop tin como meta pa aumenta e conocemento y crea concientisacion tocante e Metanan Mundial pa Desaroyo Sostenibel (SDG) 2030 di Nacionnan Uni. Aruba como pais autonomo den reino Hulandes tambe a uni su mes na logra e metanan aki.
Ken por participa: SDG Commissie Aruba ta invita companianan, como tambe organizacionnan, NGO’s y prensa pa inscribi un representante cu ta traha den e area di Comunicacion, PR, Marketing of di Maneho (policy) pa acudi na e workshop.
Contenido di e workshop: E participante lo siña strategianan di Comunicacion con pa aplica e conocemento di SDG’s den e empresa of organizacion y evidence based communication. Como tambe e balor di crea partnerships, best practices y hermentnan y di e forma aki contribui na concientisacion di e Metanan Mundial pa Desaroyo Sostenibel.
Pa bo participa, ta importante pa bo registra di antemano. Por click aki:
E workshop lo ta Diaranson 27 di Maart 2024, for di 1:00 pm te cu 4:30 pm, na oficina di DEACI (Directie Economische Zaken) na Sun Plaza na Eagle. E costo lo bay ta gratis.
