Un di e problemanan mas grandi cu clientenan di FAVI ta confronta ta isolacion social  

Sary Wernet-Kelly di Fundacion FAVI

ORANJESTAD (AAN): Sary Wernet-Kelly, terapista di revalidacion di Fundacion FAVI a indica cu pronto e fundacion lo ta cumpliendo 50 aña di existencia y nan a ricibi e invitacion pa forma parti di e Oranje Fonds, na unda nan a entrega nan proyecto y nan a haya e grato noticia cu nan a cay entre e 50 nominadonan pa un di e premionan di Appeltje van Oranje.

            Wernet-Kelly a bisa cu nan ta hopi contento cu e noticia aki, y lo sigui traha duro pa yega na 100 aña mas. E existencia di FAVI semper a depende di fondonan cu nan ta haya, kiermen cu e fondo aki sigur lo beneficia e fundacion den su totalidad.

            El a splica cu nan tin mas miembronan y sigur mas trabao pa haci. Segun ultimo Censo, tin un total di 1.030 pa 1.100 persona cu tin problema di bista. Na FAVI, a conta te cu aña 2023, por lo menos 425 y cada aña nan ta bolbe conta e registracionnan y semper esaki ta conoce un aumento.

            Proyecto di FAVI ta titula 'Un cop'i te' presenta na Oranje Fonds ta enfoca pa nan drenta bek den comunidad, Wernet-Kelly a splica cu FAVI ta haci su parti cu nan servicionan special y riba nivel, pero nan kier ta mas den comunidad, pa asina comunidad mes por ta parti di e buskeda yuda trece e personanan cas. Un di e problemanan mas grandi cu FAVI ta confronta cerca personanan cu problemanan di bista ta isolacion social.

            E momento cu nan ta ricibi e noticia cu nan bista a bay hopi atras of ta afecta, tin cu ta pensa cu bida a caba. Esaki ta un pensamento eroneo y FAVI ta purbando di conscientisa, no solamente e clientenan, pero comunidad tambe,  cu esaki ta un cambio di bida y nan tin tur tools necesario pa yuda.   

            Sary Wernet-Kelly ta pidi comunidad pa subi pagina medionan social di FAVI y click e link, yena e informacionnan necesario y pa vota pa nan proyecto, ta importante pa confirma e email adres pa asina e voto conta.