Un celebracion pa inspira na crea un cambio positivo na mundo a traves di potret

Awe ta Dia Mundial di Fotografia:

• Un click, un flash, un momento specifico captura 

ORANJESTAD (AAN) Awe Dialuna 19 d Augustus ta wordo celebra e Dia Mundial di Fotografia. E fecha aki tin e obhetivo di crea un cambio positivo na mundo atravez di  potret.

   Esaki ta un manera di inspira miyones di fotografo na henter mundo, na comparti cu mas hende un potret cu ta permiti nan interpreta nan forma di wak of percibi e mundo.

   Un potret cu ta encera e suave click di e camara, un flash di luz y un momento di e tempo captura pa semper. E por ta digital, kizas den un cinema, cu camara tradicional, Daguerrotipo, pues, e medio no ta asina importante como e momento capta, cu ta laga un memoria di: un grupo di hende, un bahada di solo, un pisca ta bula pafo di awa, un vapor na distancia, etc., semper un potret ta un manera di sinti e emocion den e contexto di un momento specifico.

   Historia: E Dia Mundial di fotografia (potret) a wordo enfatiza na 2009, pa Korske Ara, un hoben fotografo australiano cu a bin cu djis e idea di sigui celebr’e y cu a bira e mayor celebracion fotografico na mundo.

   Pero e Dia Mundial di Fotografia, realmente tin su origen cu e invencion di e potret daguerrotipo, inventa pa e Frances Louis Daguerre, p’esey su nomber, cu a introduci esaki na aña 1839.

   Conmemora e fecha aki ta dirigi na anima mas hende pa tuma potretnan na momentonan specifico, pa comparti cu henter mundo y inspira tur colega fotografo den cada pais y globalmente.

   Su lema y obhetivo ta pa conecta miyones di fotografo pa celebra e dia y inverti den nan sociedadnan den forma di potret. Potretnan ta conta historia! Un potret por bisa hopi, sin pronuncia un palabra.

   E fecha aki ta un esfuerzo pa habri wowo y mira tur e posibilidadnan cu e fotografia (potret) tin y asina permiti e  personanan pa mustra e mundo net na e manera con nan ta mir’e, independiente di ken, na unda y cual ekipo y habilidadnan cada un tin p’aden.

   E ekipo di e Dia Mundial di Fotografia a bin ta traha hunto cu organizacionnan y ta aporta fondonan pa logra cambionan positivo.