Ora hende lesa e historia mundial, ta resalta cu hende homber tabatin tur derecho y e hende muhe su unico derecho tabata pa haya y cuida yiu, cushina,
haci cas limpi, laba paña y complace e homber. Protesta contra esaki tabata ser resolve pa e homber cu mokete loke tabatin como resultado hopi biaha, morto di e hende muhe.
Violencia contra hende muhe ta existi desde principio di mundo. Hasta e Biblia ta menciona tratonan cruel contra hende muhe den Testament Bieu (Huez 19 -21). Ta Cristo Hesus ta esun cu a mustra compasion pa un hende muhe den Testament Nobo (Juan. 8) unda un grupo di hende homber kier a piedra un hende muhe cu a comete adulterio. Hesus a bisa e palabranan famoso: “esun di boso cu ta SIN pica, laga e tira e prome piedra! Ningun homber a tira un piedra y un pa un a bay for di e luga ey. Ripara cu pa por papia di adulterio tin mester di dos hende, un hende homber y un hende muhe. Sin embargo, no ta ser menciona ningun homber cu nan lo tira mata cu piedra!
Prome cu mitad di siglo 19 ningun teoria di violencia domestico ta ser menciona. E motibo tabata cu violencia domestico no tabata ser reconoci como un problema social, pasobra un famia tabata ser mira como un entitad priva. Na 1848 a ser organisa un Conferencia pa un grupo di hende muhe feminista na Seneca Falls USA. Nan tabata exigi e derecho di por vota. Despues a sigui un movimiento feminista na 1960 y 1970 cu tabata condena violencia domestico contra e hende muhe y e hecho cu hende muhe no tabatin e mesun derecho cu e hende homber.
E hende muhernan aki tabata ser humiya publicamente. Nan tabata ser yama pa LOCO y Prostituta. Pero a sosode dos hecho, cu a hala atencion di henter e nacion tocante e problema di violencia domestico contra e hende muhe: 1. E asesinato di Nicole Simpson y su amigo pa su ex casa, e famoso footbalista americano O.J. Simpson y tambe pasobra su condena a ser televisa y a yama e atencion di henter pueblo Americano y 2. E película tocante e bida violento di e famoso cantante Tina Turner. Na 2002 e World Health Organization (Organizacion Mundial di Salud), a reconoce violencia domestico como un problema di salud global. Poco poco, e lucha pa reconoce e derechonan di hende muhe a cuminsa crece.
Na Hulanda un grupo di Feminista bou liderazgo di Wilhelmina Drucker a lanta y tabata exigi derechonan igual. Nan a haya e nomber despreciativo di “Dolle Mina” (1880 -1925). Mundo henter conoce e caso di Malala Yousafzai, un mucha muhe jong di 14 aña cu tabatin e curashi di exigi e derecho pa mucha muhernan bay scol. El a ser tira pa e Taliban hasta den su cara, pero el a sobrebibi y a haya e chens di bay biba y studia na USA. El a ricibi e Premio Nobel di Paz pa su valentía y pa su constante lucha pa mucha muhenan haya e derecho di bay scol, especialmente na paisnan unda mucha muhe y hende muhe ainda ta ser oprimi.
E Declaracion Universal di Derechonan Humano y e Convencion pa e proteccion di Derechonan Humano y Libertad Fundamental, a ser firma dia 10 di december 1948 na Paris. El a ser traduci na 500 idioma. E prome articulo ta proclama cu:
- Tur ser humano ta nace liber y igual den dignidad y derechonan……….
- Tur hende tin e mesun derecho y libertad menciona den e Declaracion aki, sin ningun distincion manera raza, color, sexo, idioma, religion, opinion politico of otro opinion, origen nacional of social, propiedad, nacemento, of otro status………
- Tur hende tin e derecho di biba, libertad y seguridad di su persona…….
E Declaracion aki di Derechonan Humano ta ofrece proteccion contra abuso di hende muhe basa riba e tres articulonan aki.
Na 1979 a ser adopta pa e Nacionnan Uni e Convencion pa eliminacion di tur clase di discriminacion contra Hende Muhe, tambe conoci como CEDAW. E Tratado aki ta conoci di duna proteccion na tur hende muhe na mundo.
Na 1994 e Tratado Inter- Americano, tocante e Prevencion, Castigo y Eradicacion di Violencia contra Hende Muhe, miho conoci como “Tratado di Belem do Para” a ser adopta pa e Organiscion di Estadonan Americano (OAS). Den su preámbulo a sr menciona cu violencia contra hende muhe ta “un manifestacion di e poder historico di relacionan inigual entre hende homber y hende muhe” (refiriendo na Patriarchismo y Machismo).
A pesar di e Tratado valioso aki, ainda na Centro y Sur America, e hende muhe en general, Hopi Biaha NO ta ser trata igual. Te dia di awe varios hende homber di paisnan Latino, a yega di tira acido riba nan (ex)pareha pa castiga y mutila nan pasobra esakinan a bandona nan pareha pa motibo di maltrato.
Na 2003 e Maputo Protocol tocante Derechonan Humano y di Hendenan Muhe na Africa, a ser firma pa protege hende muhe contra polygamia, mutilacion vaginal, discriminacion, casamento di mucha muhenan menornan di edad, trabou den campo, esclavitud, protistucion, etc. Maske e Tratado aki ta pretende di protege e hende muhe, te dia di awe, ningun corte Africano a yega di trata un caso di maltrato of violacion (rape)!
Na 2014 e Convencion pa preveni, proteha, y persigui violencia contra hende muhe na Europa, a ser ratifica, kier meen a drenta na vigor. Pero na 2018 algun ministronan y parlamentarionan, especial-mente di Bulgaria, apoya pa cierto medio di comunicacion, a opone contra esaki y a sali afo pasobra nan a trece padilanti cu e Tratado aki lo ser uza pa reconoce hende transgenero, y matrimonio di mesun sexo. Nan a hiba e problema aki nan Corte Constitucional, cu a dicidi cu esey ta contra e Constitucion di Bulgaria y a consecuencia NO ta conta pa nan.
A pesar di e Tratadonan ariba menciona, hopi hende muhe na mundo ta indefenso, especialmente na paisnan na Asia, India, y Medio Oriente. Siman pasa a ser publica cu na Iran sustancianan a ser mezcla den cuminda di mucha muhernan pa haci nan malo pa asina stroba nan di bay scol.
Na Nigeria, Africa, tin tribunan cu ta secuestra mucha muhenan (Boko Haram) y abusa di nan. Pa e motibonan aki un Tratado nobo, yama “The Every Woman Treaty” ta ser designa pa un grupo di hurista internacional, pa crea un Tratado cu por tapa tur “buraco” den ley, cu ta stroba e ley di ser aplica contra derecho di hende muhe rond mundo, cu otro palabra: cu ta valido internacionalmente.
Mare esey por bira realidad y hende muhe por disfruta mundialmente di tur e derehonan cu hende homber tin.
Mr.dr. Alida (Lily) Rasmijn Marval
