Dia 20 di Maart e lo ta
ORANJESTAD(AAN): E aña aki un biaha mas IBiSA ta organiza e Aruba International Half Marathon y durante un conferencia di prensa na The Cove den Alhambra Casino William Erasmus di IBiSA a splica cu banda di Alhambra Casino cu semper ta yuda organiza e careda aki, ‘One Healthy Day’ ta bira partner e aña aki pa e actividad.
“E ta un organizacion cu ta organiza actividad pa un dia completo di actividad fisico, deporte, movecion y salud”.
E half marathon lo bira apertura di e actividad durante full e dia, riba 20 di Maart, segun Erasmus.
El a sigui bisa cu e intencion ta pa riba e dia ey tin actividad full rond Aruba completamente gratuito, cu ta inclui entre otro yoga, baliamento y diferente tipo di deporte.
Pa loke ta e half marathon, e careda riba 20 di Maart ta for di Joe Laveist Ballpark te cu Alhambra.
E actividad ta consisti di e parti individual di 21 kilometer, hunto cu un categoria nobo introduci e aña aki cu ta e ‘Duo’, unda cu cada un di miembronan di e duo ta core 10.5 kilometer.
“Nos tin tambe e categoria di ‘Corporate Relay’unda cu cada participante mester ta di mesun compania of organizacion y tin tambe e ‘Student Relay’ di 4 participante, unda cu cada participante mester core 5.25 kilometer”, segun Erasmus.
El a splica cu e relay di dos persona ta di 17 aña bay ariba y e student relay ta 12 aña bay ariba.
Pa e careda di corporate y individual e exigencia ta 18 aña bay ariba.
Pa registra bo por subi online, of pasa na IBiSA.
E participantenan na final di e careda lo haya un medaya di participacion, hunto cu un camisa dry fit.
Durante e careda lo tin postnan di awa, Gatorade y Powerade y na final di e careda e participantenan ta ricibi fruta y sopi.
“E biaha aki door cu e medidanan di COVID-19 a suaviza nos por haci hopi mas y pesey nos a dicidi di pone e ceremonia di premio na Alhambra despues di e careda”.
Nos lo evita aglomeracion si ora cu e participantenan pasa busca nan premio, segun Erasmus.
El a splica cu pa e careda ta bay tin 1000 participante y esnan cu kier registra na IBiSA por haci esaki di 8’or di mainta pa 12’or di merdia, of di 1’or pa 4’or di atardi.
Segun Erasmus, manera tur aña ta bay tin e asina yama ‘package pickup’ na Alhambra stores y esaki ta bay ta riba 19 di Maart for di 9’or di mainta te cu 3’or di atardi, caminda tur e coredor y teamnan por pasa busca nan pakete di coremento.
Riba dia 19 e teamnan lo haya tambe informacion tocante e relay, pa haya sa e detayenan di entre otro unda cada punto di relay ta bay ta.
