ORANJESTAD (AAN): Pa di dos aña consecutivo, Guardian Group a asocia su mes cu University for Peace (UPEACE) crea pa e Asamblea General di Nacionnan Uni, pa ofrece 10 beca di e Diploma di Liderazgo Global den henter e region.
Aña pasa e cooperacion historico aki a haya un acogida grandi, pasobra casi 400 persona di henter Caribe a entrega peticion pa busca forma pa haya un beca. Pa splica pakico Guardian Group a escoge pa inverti den den e beca pa Diploma di Liderazgo Global pa e region, e Director General di Guardian Group, Ravi Tewari, a describi esaki como “un chens unico pa e potencial lidernan emergente di Caribe cumpli cu nan vision- y metanan individual na trece un cambio pisitivo den comunidad y e medio ambiente den cual nan ta biba.”
Ravi Tewari a bisa cu for di perspectiva di Guardian Group, tin un necesidad urgente pa liderazgo inovativo, visionario, y compasivo na varios nivel. “Nos ta biba den temponan extraordinario y cu no por pronostica, y pesey tin mester urgentemente un liderazgo inovador, awor mas cu nunca.”
El a agrega: “E reaccion abrumador di e iniciativa di aña pasa y e numeroso proyectonan y personanan di henter e region cu e becanan a sostene, ta pone cu esaki ta bira un di e eventonan favorito cu lo bay mustra e beneficionan enorme pa futuro.” Un di e efectonan indirecto positivo tabata e cantidad di studiante di Caribe pafo di e iniciativa di beca, cu a bin ta registrando na e U.N. University for Peace. E universidad a raporta cu Caribe ta bin ta birando e region cu tin mas interes compara cu demas studiantenan internacional, como resultado di e luz cu e colaboracion cu Guardian Group a ilumina riba nan.
E oferta pa beca pa 2021 ta habri pa tur hende cu ta biba den Caribe. Aplicantenan mester indica via di un dictee (‘essay’), e formanan cu e beca lo yuda nan pa contribui na e region. Un hurado independiente di UPEACE lo bay determina kende lo ta e diez ganadornan afortuna di e beca.
Personanan interesa por solicita e Guardian Group’s Global Leadership Diploma Scholarship Program cu e University for Peace (UPEACE) estableci cu Nacionnan uni, via nan Center for Executive Education na: ggscholarship.com
