ORANJESTAD (AAN) – Director di “Stichting Algemene Bejaardenzorg Aruba” (SABA) Remo Kock, den conferencia di prensa cu a tuma lugar na Hospital Dr. Horacio Oduber,
relaciona cu e rapport elabora pa e Comision di Cuido (di cual e ta parti), a expresa cu prome cune, tur cos a wordo bisa cu palabranan nechi, pero e ta bise den palabranan crioyo.
“Cuido na Aruba ta zink! Ningun hende ta papia di e pueblo di Aruba ni di e grandinan, nos famianan. Ora cu nan mester yega un cierto edad, cu nan mester haya cuido cronico, no tin!
Aworaki cu tin politiconan ta cana rond, haciendo promesanan, ami kier sa si cosnan ta bay cambia di berdad. Tin leynan pa cuido cronico, cu no tey ainda. E 5.5% cu a wordo menciona, no ta conta pa SABA.
“SABA ta cay bao di subsidio. Di SABA nan a kita 12.6% per direct, ora cu covid-19 a drenta. Esey ta mas of menos 2.9 miyon florin menos. Y nan ta expect cu mi tin e mesun cantidad di cliente. Menos placa, mas cliente, ta menos cuido”, Remo Kock a subraya.
El a sigui bisa cu esey no ta conta pa SABA so. E ta conta pa tur e sector di cuido.
“Tene na cuenta, boso tur mester ta contento cu boso no tin malesanan cronico. E momento cu bo haya bo mes cu malesa cronico anto bo tin cu puntra bo mes, si bo ta haya e cuido necesario, e ora ey bo ta puntra bo mes: ‘na unda nos ta bayendo cu Aruba?’ Nos por ta trankilo, tanten cu nos no sa ki ta pasando. Pero cuminza pensa riba bo mama, bo tata, bo tionan. Mi tin tio y tantanan cu a pasa 75 aña bay. Ora nan bira malo nan ta bay Hospital y ora cu nan keda cla na hospital, nan no por bay cas bek. Unda nan tin cu bay? No cerca nos. No tin ley pa cubri e cuido cronico”, el a remarca.
Remo Kock a señala cu ora cu Aruba haya un partido nobo na mando, despues di e ‘verkiezingnan’, esaki ta e tipo di cosnan cu mester bay traha riba dje.
“No lubida nos pueblo cu no sa kico ta pasando. Aworaki tin hende cu ta bayendo e policlinica, y e docter ta bise ‘bo sa mi no por yuda bo, mester wak riba lista di spera pasobra no tin docter mas. Eynan nos kier bay como pueblo?”
Kock a conta cu su mayornan a nace na Playa; y e ta un Arubiano di pura cepa, y cu dolor e ta wak unda nos cuido na Aruba ta bayendo.
“Y si boso sa con el a bay na Suriname, cuminza wak: si nos no bin cu solucionnan bon, na dado momento, nos ta haya nos mes den un problema grandi na Aruba”, Kock a expresa.
Kock ta di acuerdo cu mester baha gasto, pero mester bin cu un programa pa esey. “Un programa di gobierno, conhuntamente cu sector di cuido pa nos bin na solucionnan concreto. Yen di palabra nechi, a wordo poni den contexto. Pero ora mi wak kico ta pasando eyfo, cu mi no por yuda mi hendenan, cu ta yora pa drenta SABA, anto mi no tin e placa ni e camanan pa mi yuda nan, ta hopi dolor mi tin den mi curazon, ex-coleganan cu ta bin cerca mi, pasobra nan tata ta na cas cu demencia, y nos no tin lugar pa nan. Mi ta bisa nan ‘bay un cas priva’ mientras cu nos tin e experticia di enfermeranan specializa. Unda nos ta bay? Esey ta loke mi kier pa Arubianonan tende, ora cu esaki wordo transmiti”, Remo Kock a conclui.
