Un biaha cu bo causa daño na bo oido esaki no ta bin bek

Minister Dangui Oduber:

ORANJESTAD (AAN): Minister di Salubridad Dangui Oduber Dialuna tabata presente na FEPOH pa apertura di e Siman di Concientizacion pa Cuido di Oido, cu pa di 35 aña ta wordo organiza pa Quota Club.

Prome cu e mandatario mes a bay haci su test di oido, el a hiba palabra.

Oduber a trece dilanti cu su ministerio como tambe instancianan manera Quota Club y FEPOH tin como tarea pa educa y concientiza nos comunidad di e importancia di cuida nos oido.

“Mi ta kere cu nos tur mester ta hopi conciente di e hecho cu un biaha bo causa daño na bo oido of perde oido, bo no ta recupera esaki”.

Mi mes ta testigo di esaki, pasobra aña pasa ora cu mi a haci e test, mi a haya sa cu mi oido a bay atras, segun Oduber.

El a sigui bisa cu e mes a dicidi di haci menos uso di air pods, mirando cu esey por afecta bo oido.

“Mi ta kere cu e simannan manera esun aki cu a wordo organiza pa Quota Club, ta hopi importante pa habitantenan di nos isla haci uso di e oportunidad pa haci un test di oido ta cualkier un di e 4 lugarnan menciona”.

"Mi kier a gradici Quota y FEPOH pa tur e trabaonan boluntario cu boso ta haci pa nos comunidad, segun e mandatario, kende a pidi pa tur hende enfoca pa cuido nan oido".