ORANJESTAD (AAN): Esaki ta ultimo siman pa inscribi. DIARIO a haya sa cu e deadline pa haci esaki ta Diasabra 30 April 2022.
GLW Foundation ta den pleno preparacion pa Miss Teen Aruba International 2022. E aña aki celebrando 13 aña di eleccion unda cu durante añanan Miss Teen Aruba International a sa di demostra cu e comision ta traha den e mihor formacion di e candidatanan y e logronan durante e ultimo 15 añanan aki cu George Winterdaal como Presidente pa e prueba di e trabao cu e candidatanan.
Paisnan unda e candidatanan a bay ta Republica Dominicana, Panama, El Salvador, Bahamas, Guatemala, Costa Rica, Nicaragua, Honduras, Bulgaria y mas. Desde cu George a tuma e presidencia di Miss Teen Aruba y despues Miss Teen Aruba International a usa e lema “Algo mas cu un certamen di beyeza” y tur aña ta organiza diferente proyectonan.
Recien mes DIARIO a tuma nota con GLW Foundation ta organiza e evento di fundraising e.o Cupcake di Speranza, Un man pa nos Ruman, Feed the Kids y tambe un sin fin di actividadnan caritativo cu e candidatanan. E commission organizador ta sigur prepara e candidata cu tur equipo necesario pa asina por yude den su desaroyo pa futuro.
Ta facil pa participa: Si abo como hoben kier participa, e ta masha facil. Ademas e aña aki GLW Foundation a haci algun cambio masha interesante. Nan a amplia e categorianan y awor ta duna mas hoben e chens pa por participa.
Lo tin categoria Petite (Miss Teen Petite Aruba International), y esaki pa hobennan di estatura abao te cu maximo 1.63 meter.
Lo tin categoria Regular (Miss Teen Aruba International), y esaki pa e hobennan di estatura riba 1.63 meter.
Lo tin categoria Plus (Miss Teen Aruba Glorious International), y esaki pa e hobennan cu tin curva (estatura no ta importante).
Pa participa bo mester tin e edad di 15 pa 19 aña, y cu hopi gana di pasa den un experiencia unico, cu chens di representa Aruba na nivel international.
Encuanto e gastonan: Hopi biaha e preocupacion di Mayornan ta e gastonan halto cu no necesariamente ta asina, mirando e situacion, comision organizador mes ta cubri basta cos di e candidata, basicamente e unico gasto ta e trahe di gala cu no necesariamente mester ta un shimis demasiado costoso paso e trahe no ta saca e candidata.
E candidatanan lo ricibi di e organizadornan diferente Polo Shirts di Miss Teen Aruba International cual ta ser usa pa e diferente actividad. E anochi final no lo tin competencia di Trahe de Baño pero Trahe Deportivo cual tambe e candidata ta ricibi esaki di e organizadorbab, ademas e candidata ta ricibi su zapato.
E certamen final di Miss Teen Aruba International lo tuma lugar diadomingo 17 di Juli den Cas di Cultura. Por contact 561-6151 y ultimo dia pa inscribi lo ta Diasabra 30 di April.
