ORANJESTAD (AA)—Den conferencia di prensa, Joseandro Chiquito a informa cu despues di un tempo duro di pandemia,
awo ta momento pa sali bek y “overcome” otro obstaculonan y aworaki ta e evento asina gusta “Funstacle Masters”.
Joseandro a expresa cu nan ta hopi ansioso pa bin cu e evento aki bek. El a bisa cu normalmente ta cinco kilometer, pero e biaha aki pa “start up” y “warm up” a dicidi di organiza un “circuit sprint” cu ta un local market banda di Bochincha y clean wheels tambe.
Joseandro a agrega cu manera Funstacle Master ta conoci, loke ta wordo produci ta bay pa un fundacion, y e aña aki ta pa Jordan Ling Foundation, cu ta specificamente pa “health awareness”.
E hoben a menciona cu e evento aki ta conoci for di aña 2013, y ta wordo organiza na Aruba, Bonaire y Curacao. Pa Aruba mes esaki ta bay ta e di diez edicion y tin diferente localidad unda nan ta haci nan eventonan. E biaha aki nan a scoge “Circuit Sprint” cu ta un tiki mas chikito pero e speed un tiki mas lihe. “Nos ta encurasha tur compania pa participa y e participantenan pa reta otro pa pasa e obstaculonan”. El a agrega cu Bochincha lo asisti nan cu e parti di entretenimento.
Den e rekisitonan cu tin, nan ta pidi cu si tin menor di edad cu kier participa, pa semper ta acompaña pa un mayor di edad.
El a agrega cu no tin cantidad maximo di participante pasobra por hacie individual of cu un team grandi, y por hacie cu e intensidad cu persona kier. El a señala cu pa hopi compania esaki ta un oportunidad pa haci un “team building”, pero tambe cu famia, amigonan banda di cas, y pasa un rato entreteni y ameno.
Naturalmente, e participantenan mester por cana y core, y si tin un problema medico e por dicidi cu su docter si e por of no participa. “Claro cu nos ta pidi tur hende pa ta cauteloso y conciente di su mesun capacidadnan fisico”, Joseandro a indica. Lo tin dos dia di evento cu ta diamars 26 pa 7 or di anochi. Great ta cu dia 27 ta un dia liber, Chiquito a bisa. E di dos evento ta riba Dia 1 di Mei y lo cuminza pa 5 or di atardi.
