Turistanan tur spanta y nervioso pa nan no perde vuelo

Accion di Taxistanan a escala

• Nan a haya nan ta cana di highway yega te terminal 

ORANJESTAD (AAN): Dialuna e accion di protesta di Taxistanan na Aruba a escala, ora cu nan a bin topa cu un Ministro cabezura cu a mustra claramente cu e no tin ningun intencion di baha cabez y revoca e medida inespera, cu el a introduci “out-of-the-blue” sin check cu Stakeholders ni nada.

   Mesora e Taxistanan a dicidi pa blokea entrada di Waf, net riba un dia cu tabatin 3 barco crusero aden, esta Adventure of the Seas di Royal Caribbean, y tanto Carnival Horizon y tambe Carnival Mardi Grass, ambos di Carnival Cruise Lines.

   Ademas di esey, mayoria Taxista a bay blokea e salida di Spiral Rotonde cu ta drenta pa Aeropuerto.  Consecuencia di esey ta cu ningun auto, truck, ni bus no por a pasa mas.  Hasta habitantenan di Parkietenbos of Cas Paloma tampoco no por a sali di eynan, debi cu nan a keda blokea.

   Consecuencia di esaki ta cu turistanan cu tabatin nan vuelo di regreso riba Diamars, a cuminsa preocupa, bira nervioso, y tur spanta buscando forma pa yega Aeropuerto.  Pero nan no por a yega cerca.  Obliga nan tabata baha di auto mey-mey di caminda mes, recoge maleta den baul y na pia cana e distancia di 200 meter pa yega e Terminal di US Bound, of 290 meter pa yega e Terminal di Vuelonan Internacional.

   Aeropuerto di Aruba tambe riba su Social Media a adverti riba e situacion di Taxi, y a pidi pasaheronan pa tuma extra tempo pa por yega Aeropuerto.

   Dado momento e stagnacion riba rotonde a pone trafico pega bay pabao te casi Rotonde Las Americas.  Trafico riba WVB Boulevard tambe a pega.  Igual cu esnan cu ta bin pariba riba Green Corridor.

   Riba Social Media por a nota monton di mensahenan fuerte cu turistanan tabata dirigi pa cu e situacion cu a presenta Diamars na Aruba.

   Riba e potretnan aki por mira pasaheronan canando cu cara nada contento, pasando mey-mey di e Taxistanan pa yega na Terminal pa bay check-in.  Tabatin uno cu a hasta puntra, di con Aeropuerto no a yega cerca cu un pickup of baki pa pone maleta aden pa hiba “te na Airport building”.

   Hendenan tabata bisa nan na banda: “Blame the Government for this”.  Increible con Gobierno cu semper a biba cu e reglanan existente di Taxi, diripiente a laga tur esaki pasa pa varios dia largo, sin tuma decision.

   Hecho ta riba Diamars, Aruba a pasa un dia igual cu un hende a dal mokete den cara y a laga un wowo blauw.