Turistanan por forma parti den plannan di conservacion di ecologia y naturaleza

ORANJESTAD (AAN): Durante un conferencia di prensa Diaranzon mainta, parlamentario di MEP Arthur Vallejo a papia di un cumbre na cual manager di Bucuti & Tara Beach Resort Ewald Biemans ta participa na Escocia,

unda cu ta papia entre otro di ‘Regenerative Tourism’, esta turismo di regeneracion.

“Esaki basicamente ta un concepto pa crea abundancia den conservacion, comunidad, cultura y colaboracion”.

E parti aki ta hopi importante, pasobra nos ta duna e turista un oportunidad pa colabora den e problema ecologico di naturaleza, por ehempel di Aruba, segun Vallejo.

El a indica cu por ehempel por crea paketenan of plannan, caminda cu e turista por yuda planta mata local of yuda bin cu sistemanan unda cu por yuda den nos rifnan di coral.

“Nos tin instancianan cu ta trahando caba den esaki, pero sigur Gobierno por yuda e instancianan aki y amplifica nan lucha pa conserva nos procesonan ecologico y natural”.

Esaki ta hopi importante, pasobra e ta crea un niche nobo, unda cu banda di e viahe di placer di e turista of viahe di negoshi, e por bira un viahe di impacto, caminda cu e turista por crea un impacto.

E turista por bin Aruba y bisa, mi a disfruta pero mi a logra yuda conserva naturaleza di e isla, segun e parlamentario.

Vallejo a sigui bisa cu esaki por ta un bunita oportunidad pa uza e manpower aki di e turistanan cu ta bin y tin un stimacion pa Aruba, pa nan tambe yuda conserva naturaleza y ecologia.