MADRID: Turistanan di Gran Britaña a haya sa caba, cu kizas nan lo wordo forza pa proba cu nan tin por lo menos 1.638 Florin pa gasta,
pa asina por drenta Spaña e verano aki, awor cu nan ta introduci medidanan cu ta pone turistanan Britanico den e mesun categoria cu esnan cu ta viahando for di un pais di ‘tercer mundo’ pafo di Union Europeo.
Gobierno di Spaña a indica cu despues di Brexit, awor e turistanan Britanico cu lo kier drenta nan pais, lo tin di bay demostra cu nan tin suficiente placa pa nan estadia. Esey ta un minimo di 100 Euro pa persona pa dia, y cu nan tin 900 Euro (como 1.638 Florin) obtenible na fondo.
Esey nifica, cu un famia di 4 persona di Inglatera cu ta bay hospeda na Spaña pa un siman, lo tin di bay proba na entrada cu nan tin por lo menos 3.600 Euro (como 6.552 Florin) prome cu nan por drenta den e pais. Turistanan cu ta bin for di pafo di Union Europeo, ta wordo pidi pa usa placa cash, checks, travellers’ checks, of credit card, como tambe statement di banco como prueba di tin fondo.
Agentenan di Frontera di Spaña lo por pidi turistanan tambe pa mustra un pasashi di regreso of di vuelo pa otro pais, of bin cu prueba di acomodacion pa asina nan por wordo acepta den e pais.
Si acaso bo ta bay keda cu famia of amigonan, un di e opcionnan ta tambe e “carta de invitacion” cu ta proba cu bo ta bay hospeda cerca nan.
Hopi turista a expresa nan sorpresa riba Social Media pa cu e medida nobo aki. Nan ta indica cu e regla aki lo bay dal specialmente studiantenan y otro personanan cu ta buscando un forma barata di bay pasa vacantie na Spaña.
Na aña 2019, mas di 18 miyon turista Britanico a bishita Spaña. Segun reglanan spaño, e turista Britanico tin di mustra prueba tambe cu nan ta vacuna pa Covid-19, mester bin cu un resultado negativo di Covid, of un certificacion di a recupera di Covid. Pa bo conta como ‘completamente vacuna’ na Spaña, e turista mester tin su di dos (of booster shot) menos di 270 dia pasa.
Siman pasa a wordo divulga, cu Gran Britaña a cay te na di #6 den un liga di e paspoortnan mas poderoso di mundo, compila pa e consultancy di imigracion Henley & Partners. Japon ta na e puesto mas halto, cu acceso sin restriccion pa 193 pais, compara cu djis 158 pais pa esnan cu tin paspoort Britanico.
