Segun Director di Hospital, Jacco Vroegop:
ORANJESTAD (AAN): Director di Hospital, Jacco Vroegop, durante un entrevista cu DIARIO a expresa preocupacion tocante e cantidad halto di turista cu ta yega Aruba sin seguro medico of cu un seguro cu no ta brinda cobertura suficiente.
Segun Vroegop, mayoria di e cuido cu Hospital ta brinda na turista sin cobertura ta cuido urgente, cual Hospital no por nenga. Ora un turista haya un accidente serio riba caminda of cu un UTV, por ehempel, Hospital mester actua inmediatamente pa evita complicacion y daño adicional. Den e casonan aki, no ta posibel pa manda e pashent bay y bin bek te ora cu e por paga.
Hospital ta limita e tratamento na loke ta medicamente necesario y ta trata cu cautela e gastonan haci. Sinembargo, e costo di cuido urgente por ta considerabel y Hospital no tin un fuente specifico pa cubri cuenta cu turista no por of no kier paga.
Vroegop a revela cu 58% di e pashentnan Mericano cu ta presenta na Emergencia y despues mester haya tratamento of wordo admiti na Hospital no tin seguro adecuado of no tin seguro mes. Segun e Director, esaki ta crea un carga financiero grandi pa Hospital.
Ora e cuenta no por wordo cobra cerca di turista, Hospital mester busca otro manera pa cubri e gasto. Un parti ta wordo recupera cobrando otro turista tarifanan mas halto, pero indirectamente fondo cu ta destina pa cuido di e poblacion asegura pa AZV tambe por keda bou di presion. Na final, e situacion por afecta e placa y capacidad disponibel pa cuido di e propio poblacion di Aruba.
Hospital a escala e asunto na final di aña pasa y cuminsamento di e aña aki cerca di Minister di Salubridad Publico, Minister di Turismo y Minister di Husticia. Segun Vroegop, na januari Minister a compromete su mes pa establece un fondo na luna di october. For di e fondo aki, proveedor di cuido lo por recupera gastonan relaciona cu turista cu no tin seguro of cu tin cobertura insuficiente. Un documento relaciona cu e compromiso a wordo firma, cu Aruba Tourism Authority, ATA, envolvi den e proceso.
Vroegop ta considera cu ATA tambe tin un responsabilidad pa informa bishitantenan adecuadamente. Ademas di promociona Aruba su beachnan y oferta turistico, turista mester sa cu e isla tin cuido medico di calidad, pero cu nan mes tin responsabilidad pa bin prepara y asegura.
Segun e Director, diferente pais ta exigi comprobante di seguro como condicion di entrada. Aruba a demostra durante pandemia di Covid-19 cu un sistema similar por funciona. E tempo ey, cada turista tabata obliga pa tin cobertura specífico pa eventual gastonan relaciona cu Covid-19, financia mediante un contribucion adicional.
Hospital ta propone un modelo comparabel: un contribucion obligatorio di aproximadamente US$2 pa US$3 pa cada turista, deposita den un fondo destina pa cuido medico no paga. Vroegop ta considera cu e suma aki no lo haci Aruba menos competitivo, specialmente compara cu otro gastonan cu turistanan ta haci durante nan estadia.
E Director ta lamenta cu, apesar di carta manda y compromiso haci, Hospital ainda no a ricibi un contesta concreto. E ta enfatisa cu e problema no solamente ta financiero. Si Hospital no tin cama, personal of recurso suficiente, esaki por resulta den menos capacidad pa atende tanto bishitante como e propio poblacion.
Hospital, p’esey, ta pidi Gobierno y e instancianan concerni pa cumpli cu e compromiso y stablece un solucion structural. E meta ta pa e gastonan wordo cubri door di un sistema hustifica, sin pone e carga riba Hospital ni riba e fondo di cuido medico di e comunidad Arubano.
