Den su preguntanan pa Minister di Salud, parlamentario Tromp Lee kier sa:
ORANJESTAD (AAN)-- Parlamentario Shailiny Tromp-Lee, di Fraccion di MEP, a sigui splica den su reaccion tocante e situacion di crisis financiero y operacional di Hospital Dr. Horacio Oduber, cu su preguntanan pa Minister di Salud Mervin Wyatt-Ras, a bay pa verifica e informacion (duna pa Presidente di Sindicato di Enfermeria), pa haya sa ki dia e minister a keda informa oficialmente di e situacion, door di ken, kico tur ta wordo haci pa atende cu e situacion aki, con ta bay atende cu e perdida di entrada cu wordo informa di dje, ki e suma exactamente ta, con ta bay carga e deficit aki, con e relacion ta cu AZV, ya cu ta bisa cu loke a wordo presenta pa AZV no ta un solucion real.
“Kico ta e solucion real tambe y e parti mas esencial, kico ta e medidanan di urgencia cu ta bay keda tuma pa proteha nos pashentnan y e situacion actual y e listanan di spera a bira peor? Ki a wordo sugeri over di operacion, tratamentonan specializa? Nos tur sa mas ta tarda pa tratamento of operacion, di un persona cu ta malo, esey no ta beneficia nos pashentnan. Pero, e ta algo cu nos sa cu pa hopi tempo ta papia di dje, pero esaki ta un situacion hopi grave den su totalidad; dus, mi ta sinti cu mester bin claridad di informacion al respecto. Mi kier djis pa pueblo sa cu e preguntanan a bay, anto mi kier enfatiza tambe cu n o mester lubida cu cuido di salud ta un di e pilarnan mas fundamental di nos sociedad. Nos pueblo tin derecho riba un sistema di salud stabil y di miho calidad.
P’esey mes mi ta keda na spera di e contestanan di e minister, pa nos por haya y brinda transparencia completo, y mas cu tur cos, e cos mas esencial, busca solucion structural pa loke ta trata e retonan cu tin na Hospital”, e Parlamentario a remarca.
Finalmente, el a señala cu como Presidente di e Comision di Finanzas, Organizacion Gubernamental, Cultura y Deporte, tambe el a manda e peticion pa yama tres reunion pa cuminza cu Hospital mes, e Sindicato, y AZV. “Y a base di e tres reunionnan lo dicidi si ta sigui cu un reunion cu e minister, of ta yama e minister pa un reunion publico”, Parlamentario Tromp-Lee a conclui.
