ORANJESTAD (AAN): Su placer di bida tabata haci viahe, y como cu el a bishita Aruba na asina hopi ocasion, el a yega di wordo nombra como ‘Embahador di Bon Boluntad’ di Aruba!
Sinembargo Diasabra cu a pasa, e turista Theodora McMahon, mihor conoci como Teddy, a fayece cu 85 aña di edad na East Chicago, estado di Indiana na Merca.
El a bay lagando su yiu muher, dos nieto, 7 bisanieto, ruman homber y ruman muher, y varios primo y prima.
Señora McMahon tabata un viahero cu gusta viaha tur lugar cu e ta interesa pa conoce, sinembargo semper Aruba tabata esun cu mas el a stima. Pesey mes el a yega di haya e titulo di Goodwill Ambassador pa Aruba.
Diahuebs mainta tabatin un ceremonia di religioso y despedida, y despues tabatin un cremacion priva na e funeraria na East Chicago.
