Dilanti Boca Catalina
ORANJESTAD (AAN): Dialuna mainta banda di 11:15 am, Central di Polis a core manda un unidad di Strandpolitie na e beach di Boca Catalina. Pasobra un hende a yama pa bisa cu un turista sea a hoga of a bira basta malo den lama.
Ora cu Polis a yega, agentenan a ripara cu tin un Catamaran color cora y blanco hopi cerca di oriya di lama. For di leu por mira cu riba e Catamaran tin algun persona ta aplicando CPR riba un persona. Algun persona eybanda a bisa Polis, cu esaki ta andando pa como 20 pa 30 minuut caba.
Polisnan a haya esaki raro, como cu e melding a caba di drenta par di minuut prome. Poco rato un boto dinghy chikito a yega, y a tuma e victima y a nabega bin na oruiya di lama na Boca Catalina. Ambulance tambe tabata presente, y e paramediconan a tuma e victima di e boto, y a pone riba un brancard. E brancard nobo aki tin un machine cu ta yuda haci CPR riba e victima.
Nan a hinca e victima mesora den Ambulance, y e momento ey e victima ainda no tabata duna señal di bida. Polis a mira e victima y ta calcula cu e ta un persona di riba 60 aña di edad. Ningun hende eynan tabatin informacion di e victima.
E Capitan a bisa cu e homber tabata snorkel. El a bay snorkel basta leu te yega e otro Catamaran. E homber a dicidi na duik bay pasa bao di e Catamaran, y a sali bek patras di e Catamaran unda tin un “safety float ring”.
Dado momento, e personal di e Catamaran a ripara cu e homber no ta reaccionando. Nan a bula den lama y yega cerca di e victima, y a sake di lama y pone na e Catamaran cu ta esun cu por bay mas rapido na oriya di lama.
Mas laat a drenta informacion cu e turista no a sobrevivi. El a wordo identifica como un Mericano di 84 aña di edad.
