Asociacion di Bankero a reacciona
ORANJESTAD (AAN): Despues cu Comerciantenan Uni di Aruba (CUA) a bati alarma y notifica demas comerciantenan na Aruba pa revisa nan documentonan, y realiza cu envez di e 0.5% transaction fee pa cada cliente cu paga cu Debit Card, cu awor na ta pagando 2,0% pa esaki. Di e forma ey hopi comerciante a bin haya sa di esey, y algun hasta a expresa pa elimina nan POS-Machine na nan Cashier pa no acepta carchinan mas.
Pero Diamars merdia, Asociacion di Bankeronan (ABA) a reacciona cu nan a tuma nota di e desaroyonan recien relaciona cu e tasa di descuento na comerciantenan.
Pesey ABA kier informa publico cu e modificacion di e tasa (‘fee’) di procesamento di transaccionnan di Mastercard Debit y/of Visa Debit tin di haber cu e cambionan introduci door di e networknan internacional di Carchi.
Bankeronan di Aruba ta splica cu Mastercard a dicidi na descontinua nan producto ‘Maestro’. Esaki nifica cu rond mundo, tur e carchinan di e marca Maestro lo wordo reemplaza pa carchinan di e marca Mastercard Debit. E producto Maestro a wordo diseña originalmente pa wordo usa den tiendanan y na mashin di ATM. E marca Maestro no ta capaz di sigui e ritmo di e tecnologia- y canalnan nobo, manera e-commerce (pago online) y pesey ta wordo elimina como un producto. Esaki ta un cambio obligatorio imponi door di e industria di Carchi cu lo afecta tur esnan cu tin carchi di Maestro di tur banco rond mundo y lo afecta tur comerciante cu ta acepta Debit Cards.
Tur banco local lo cambia pa sea Mastercard Debit of Visa Debit Card, cu tin mas caracteristica di seguridad, e posibilidad di haci pago online y ta wordo acepta rond mundo.
Un mayor aceptacion, e aumento di seguridad, mehora capacidadnan, y cumplimento di normanan di e sector ta bin cune costo mas halto di procesamento, cu ta wordo cobra pa Mastercard y Visa International, y ta refleha den e ahuste di comision di comerciantenan.
Aruba Bankers Association ta indica cu tur comerciante di Aruba por acudi na nan institucion financiero pa haya mas informacion riba e asunto aki.
