Turista Colombiano a fayece di atake di curazon pa beach di Arashi

ORANJESTAD (AAN): Tabata Diaranzon den oranan di atardi, cu yamada a drenta na Polis cu un persona turista a confronta dificulta den lama na beach di Arashi.

   Esaki a pone cu Central di Polis mesora a despacha un unidad di Polis di Noord, y tambe Strandpolitie pa mira con por duna un man.  Mesun momento a notifica Centro di Alarma pa asina nan manda Ambulans.

   Helicopter di Polis tambe tabata bula den halto y a tira un bista, por si acaso e persona ta leu for di tera.

   E prome unidad cu a yega, tabata Polis Motoriza, y nan a nota cu e persona ya caba a wordo saca di lama y ta riba tera.  E persona no tabata mustra di tin ningun señal vital mas.  Toch e Polisnan aki a cuminza practica CPR pa purba wak si por haya su curazon ta bati bek.

   Ambulans a yega y mesora Paramediconan a pone machine pa detecta pulso, y a sigui cu e intento pa reanima e persona.  Sinembargo ya tabata demasiado laat.

   Polis na e lugar a pidi pa manda autoridad competente na e lugar, y a pidi yudanza tambe di Bureau Slachtofferhulp pa asisti e famia.

   Ambulance via di Centro di Alarma a pidi pa manda un Docter eybao pa check e persona aki.  Un poco prome cu 5:50 pm, Dr. Texier a constata morto di e homber J.A.P. di 69 aña, kende ta un turista Colombiano.  E observacion di Docter ta cu e homber a fayece di atake di curazon.

   Shersh di Aurora Funeral Home a presenta pa asina transporta e restonan mortal.  Na famia di e fayecido, DIARIO ta manda palabranan di condolencia.