Turista bishitando Aruba pa prome biaha a pasa parti di su vakantie ta yuda como boluntario

Pa yuda personanan cu discapacidad

ORANJESTAD (AAN): E ta algo cu por mira ta socede na diferente ocasion.  Turistanan ta yega Aruba, y ora cu nan nota cu algo pa comunidad ta tumando lugar, e.o. un ‘Beach Cleanup’ of cualkier actividad den pueblo, cu nan animo di ta un boluntario, nan ta busca forma pa yega y duna un man.  Esey a socede tambe durante evento di Aruba Doet, unda turistanan ta yega y duna un man.

   Recien mes na comienso di luna di Juni 2024, un pareha turista di Merca a yega y a tuma nota cu riba un Diasabra mainta tin un proyecto di agroforesteria andando na Pius X School na Dakota.  Nan a busca e scol riba nan GPS di GoogleMaps, y cu nan V-auto nan a core te yega eynan, y anuncia nan mes cu nan tambe tey pa yuda e scol cu nan prome hardin di fruta y berdura.

   Turista pasando vakantie ta yuda: Siman pasa DIARIO a haya sa di un otro turista cu a bin bishita Aruba pa prome biaha, y e dama aki a dicidi na pone man na obra como boluntario pa yuda.

   Ta trata aki di e turista Marta Robles, kende ta procedente di Colombia.  E ta un docente na su pais natal, y e biaha aki pa su vacacion a escoge pa bishita Aruba.  Esaki ta su prome biaha cu el a bishita e isla, pa asina conoce e costumber, e cultura, y e gastronomia di e isla.

   Pero como cu Marta ta un persona kende ta gusta di ta activo, el a dicidi na bay pasa algun dia ta yudando esnan cu discapacidad.  Como cu ta vacacion, el a logra haya chens di bay yuda e demas profesionalnan y boluntarionan na Ambiente Nobo na Santa Cruz.  Aki el a keda encanta pa por a interactua cu e personanan menosvalido cu ta bishita e lugar aki pa nan pasadia di tur dia.  El a yuda nan, combersa cu nan, y tin algun dama cu el a hasta pinta nan huña.

   Ademas di Ambiente Nobo, riba otro dia el a bishita Traimerdia Sonrisa na Pavia.  Aki el a yuda nan den nan proceso di por crea obhetonan basa riba nan imaginacion, y el a keda hopi encanta cu tur esaki.  Como cu e ta un docente di profesion, e tin e pasenshi y perspectiva pa asina yuda esnan na e Traimerdia aki pa por sigui expande nan posibilidad.

   DIARIO a compronde cu Diahuebs e ta regresando Colombia, y ta sigur hopi contento cu su energia pa ta un boluntario tabata e granito di arena pa asina e keda cu grato recuerdo di un vacacion completamente diferente.  El a haya chens di bishita varios beach, check e bida nocturno, y tambe haci compras na diferente lugar, y ta bayendo su pais bek cu varios regalo pa su famia.