Parlamentario Marco Berlis (MEP):
ORANJESTAD (AAN): Riba Augustus 23 2022 Centrale Bank van Aruba (CBA) a saca un comunicado di prensa den cual nan ta declara cu e economia di Pais Aruba a crece cu 16.2%. Esaki ta un crecemento grandi cu sigur ta un señal positivo cu nos pais ta recuperando paso a paso. E cifranan di e aumento economico aki ta wordo stimula principalmente door di nos sector turistico. CBA tambe ta enfatisa cu e crecimento economico fuerte aki ta surgiendo desde e di dos trimester di 2021 (P.1)
Cifranan Record Den Turismo
Aruba a ricibi un total di 233.666 turista, un aumento di 108% compara cu e prome trimester di 2021. E cantidad di anochi a casi redobla compara cu e prome trimester di 2021. Tambe tabata tin un aumento di 62.2% den e tasa di ocupacion di hotel. No ta un secreto cu turismo a bin ta kibrando tur record pa 4 luna consecutivo caba! E desaroyo positivo aki ta yudando nos economia enormemente. E vision di minister Dangui Oduber hunto cu profesionalnan den e veld ta dunando fruta excelente. Empresanan ta draai fuertemente atrobe y tin hopi empleo disponibel pa Pueblo atrobe. Por wak e area di hotelnan, nos beachnan, restaurantnan, tours y tur otro tienda ta hayando hopi benta y ta yen di turista.
Verifica e informacion di 16.2% pa bo mes
Pa esnan cu kier verifica e noticia aki, mi ta invita bo bay riba mi pagina di facebook. Aki bo por wak e documentonan y click riba e link, cual lo hiba bon a e website oficial di Banco Central y wak e documento pa bo mes. Mi pagina di Facebook ta Marco Berlis Oficial. Tambe bo por bay directamente riba e website di Banco Central di Aruba na www.cbaruba.org, bay un poco abao bo ta wak e fecha di 23 Augustus 2022: Press Release State of the Economy Q1 2022. Esaki ta e documento cu bo mester lesa. Bo por lesa tur cos na Papiamento of Ingles.
Aunke nos falta caminda ainda pa cana pa por recupera completamente economicamente, nos por bisa cu Aruba ta riba bon caminda. Nos pais ta conociendo bon desaroyonan economico cu ta duna nos e speransa cu nos lo cuminsa wak un recuperacion economico y un bahamento di e debe den futuro cercano.
