A yama bonbini na 40 mucha
ORANJESTAD (AAN): Riba 11 di Augustus 2022, Blue Energy Committee na Hilton Aruba Caribbean Resort & Casino a yama bon bini na 40 mucha cu ta yiunan di e miembronan di team pa disfruta un dia special na e resort.
E intencion tabata pa expone e muchanan edadnan 5 te cu 14 na posibilidadnan di trabao pa futuro, experiencia unda nan mayornan ta labora, disfruta di algun beneficionan di guest, y enfatisa riba e balor di educacion.
E muchanan a cuminsa e dia cu un desayuno na Morris Lapidus Ballroom, sigui pa un tour di e propiedad. E grupo a wordo dividi den cuater, y cada grupo a participa den diferente atividad planifica pa e departamento di ingenieria, housekeeping, front office, cushina, spa & recreation.
E departamento di cushina, bao supervision di Chef Olivier y su team, a prepara un setup divertido y educacional na Sunset Grille, na unda e muchanan a wordo siña algun tactica pa decora cookies. E muchanan a disfruta di un variedad di toppings y tambe tabata contento di por a mustra e resultado final na nan mayornan.
Na departamento di ingenieria, Nephtaly Croes y su team a prepara un DIY flower pot painting, y actividad pa planta mata cu e muchanan. Nos jong artistanan a wordo inspira pa e colornan lagando nan imaginacion crea pots nan colorido y bunita. Despues di e pintamento, e muchanan a yena e pochinan cu simiya y tera anto laga esakinan seca un rato prome cu hiba nan cas.
Nelson Winklaar a ricibi e muchanan na front desk unda nan a siña tocante e departamento y mas tocante e resort. Despues e grupo a conoce Jessica Roberts di departamento di Housekeeping pa conduci un inspeccion di camber na unda nan por a experiencia un variedad grandi di trabaonan y responsabilidadnan di housekeeping, asina hayando un respet nobo pa e ocupacion.
Ultimamente, e spa y recreation team a dividi e cuater gruponan den edad. E muchanan di 5 pa 9 bao liderazgo di Lisa Dammerman y su team, a participa den un decoracion di cupcake, mientras cu esnan 10 pa 14 a wordo siña con pa traha nan mesun Aloe Scrub. Ambos actividad ta parti di e hotel su actividadnan semanal cu e bishitantenan.
E muchanan tabata hopi contento anto a disfruta di tur e actividadnan aki inmensamente, pero nan tambe tabata hopi entusiasma pa por a experiencia unda nan mayornan ta traha. E alegria di e muchanan aki tabata contagioso, cual a impacta e miembronan di nos team cu hopi energia infantil pa resto di e dia.
Despues di bishita e departamentonan e muchanan a bay bek na Morris Lapidus Ballroom pa disfruta di un delicioso lunch prepara pa nos team culinario excepcional. Despues e team na Hilton Aruba hunto cu Reach Your Goal Foundation a prepara un atardi di weganan.
“Mientras nan tur tabata pasando bon,” general manager Vasco Baselli ta bisa, “e dia tambe a sirbi pa ta un oportunidad inicial pa loke ta exploracion di carera, mirando con e muchanan por a wak nan mayornan den nan rol profesional, den un ambiente autentico. Nos tabata hopi contento di por a tin tur e muchanan aki na nos resort y nos ta spera di por mira nan bek pronto!”
