Turismo di Aruba a crece bek bastante mas lihe cu locual IMF a spera

ORANJESTAD(AAN): Colegio di Supervision Financiero di Aruba (CAft)un biaha  mas tabata na Aruba y a tene un conferencia di prensa Diabierna atardi.

Presidente Raymond Gradus durante e conferencia di prensa a cuminza na  bisa cu CAft a tene combersacionnan cu entre otro Gobernador di Aruba, Minister di Finanzas, Asuntonan Economico y Cultura, Conseho di Minister y e Comision di Parlamento di Finanzas y Asuntonan Economico.

Banda di esaki nan a bishita ATA, AZV y Hospital.

Gradus a papia riba e hecho cu recuperacion di economia di Aruba ta bayendo hopi bon, unda cu el a splica cu un bon manera pa midi esaki ta e cantidad di turista cu ta keda na Aruba.

“Den un combersacion cu ATA, a sali afo cu e aña aki e cantidad di turista cu a bishita Aruba ta 76% di e cantidad cu a bin na 2019”.

Alrededor di 1 miyon turista a bishita Aruba na 2019.

Ta importante pa compara e cifranan cu locual IMF a trece dilanti di nan asina yama World Economic Outlook, como nan espectativa, segun Gradus.

El a splica cu IMF a indica cu pa 2021 nan a verwacht cu 40% di e turistanan lo ta bek riba nos isla, pa 2022 nan tabata verwacht 60%, pa 2023 80% y na 2024 100%.

“Esaki ta nifica cu na 2021 casi 2 biaha mas turista a bishita Aruba, cu locual IMF tabata verwacht via nan World Economic Outlook”.

Esaki ta importante, pasobra e turistanan aki ta forma e base pa e calculacion di e presupuesto pa Aruba, segun e presidente di CAft.

El a bisa tambe cu hopi importante pa menciona ta cu e turistanan cu ta bishita Aruba ultimo tempo ta gastando mas.

Segun Gradus, 75% di e turistanan di Aruba ta bin for di Merca y mirando cu hopi di nan a keda cu nan trabao y no tabata mucho manera pa gasta nan placa durante e pandemia, nan tin mas pa gasta riba nos isla.

Tambe ta asina cu specialmente na Merca a bin cu un asina ‘Pakete di Estimulo’, unda cu e administracion di Presidente Biden a haci un inyeccion grandi den Economia Mericano y e placa awor ta wordo gasta fuertemente.

“Aruba ta beneficia tambe di e hecho cu na e paisnan den area di Caribe cu ta competi cu e isla pa loke ta turismo, e situacion rond di e virus ainda no ta mes bon conteni cu na Aruba”.

Esaki segun Gradus, kende a indica cu ta importante sigur cu hendenan ta sinti nan mes safe na Aruba y cu e isla sigui bira mas sostenible.

Tambe ta importante cu e isla tin un clima stabil di Gobierno, segun e presidente di CAft.