Danilo Werleman, Presidente di ATIA:
- Si mester otro pilarnan economico pero ta bay tuma tempo
ORANJESTAD (AAN)- Danilo Werleman, Presidente di ATIA, den entrevista cu DIARIO a elabora tocante e importancia pa cuida nos turismo, manera e ta aworaki, y a duna su opinion relaciona cu e necesidad di crea pilarnan economico adicional.
“Bo ta wak cu tin desaroyo, sigur cu si, pero nos ta kere ainda cu turismo ta un parti hopi importante, y e ta nos ‘Golden Egg’ y nos tin cu cuide, pasobra desafortunadamente e cambionan cu nos ta expect riba otro pilarnan di economia na Aruba, lo tarda hopi. Turismo mes a tarda nos mas cu 50 aña, kiermen di, cu pa nos tin otro pilarnan ta bay tuma nos tempo. Laga nos toch enfoca riba con nos ta cuida nos turismo pa nos no tin ‘over tourism’ na Aruba, cu nos tin e turismo corecto, y cu nos ta prepara p’e, cu nos infrastructura ta prepara p’e, cu prijsnan corecto, y cu nos tin e suficiente servicionan pa duna e turistanan aki”, señor Werleman a manifesta.
E ta admiti si, cu Aruba lo mester otro pilarnan, reiterando cu e ta bay tuma tempo. Pero mester cuida nos turismo sigur.
Contestando un pregunta di DIARIO, Werleman a indica cu tambe ATIA ta preocupa cu Aruba a surpass e cantidad di turistanan caba, cu e beachnan ta sushi, y ta kere tambe cu gobierno mester tuma accion.
“Eigenlijk, nos a papia tres biaha caba riba dje, con importante ta pa nos cuida nos turismo manera cu e ta. Nos turistanan ta bin pa nos beachnan y pa nos hendenan cu nos tin na Aruba. Kiermen, nos tin cu cuida e infrastructura cu nos tin, semper, p’asina nos sigui tene e turismo ey cu ta biniendo Aruba”, Werleman a recalca.
