Tur specialista y personal a firma e ‘Rules and Regulation’ pa hisa calidad na ImSan

Logro grandi pa cuido medico!

ORANJESTAD (AAN): Diabierna cu a pasa, tabata un dia historico pa gerencia y personal di ImSan na San Nicolas.

   ImSan a logra yega na un meta unda por a firma un documento cu yama “Rules and Regulations for ImSan Medical Staff”.

   Realmente a pone riba papel, con ta anda cu otro, esta kico ta e derechonan, kico ta e obligacionnan enter mediconan mes, entre mediconan y ImSan, y entre ImSan cu e miembrecia tambe.  E ta un dia hopi balioso cu door di e madurez cu a desaroya ultimo tempo, a logra yega na nan mesun Medical Staff di ImSan y esey ta un logro hopi grandi.

   Director Joel Rajnherc di ImSan a splica cu tur e mediconan cu tabata presente na e firmamento, ta den servicio di ImSan.  Nan ta e profesionalnan cu ta forma e cara di ImSan.  Pasobra ningun hende ta acudi na ImSan pa e buniteza di edificio, sino pa e trato medico cu nan ta haya, y pa e confianza den e Docternan.

   “Pa mi ta un orguyo pa mira con e desaroyonan a bay den ultimo 2 pa 3 añanan,” Dr. Rajnherc a indica.  “Fecha 1 di April ta uno hopi importante pa mi mes, y pa ImSan.  Corda cu 1 di April 2020 tabatin e prome pashent cu a wordo trata cu radioterapia na Aruba.  Awe nos a pasa 400 pashent caba cu a wordo trata na Aruba.”

   Segun e lider di ImSan, esey nifica cu nan a spaar hopi placa di Aruba cu no mester a bay pa ‘exterior’.  “Lo mas importante ta, tur e pashentnan cu por a keda Aruba cu nan famia, cu no tabatin mester a bay afo pa haya tratamento cu ta dura simannan largo.”  Segun Dr. Rajnherc, pesey e ta un dia hopi importante.

   Dia 1 di April 2021 na ImSan a habri e Departamento di ‘Short Stay’.  Awor dia 1 di April 2022 a firma e documento di Medical Staff.

   Ademas di esey, Dr. Joel Rajnherc a indica cu personalmente, riba 1 di April pero 28 aña pasa, el a regresa cas bek, y e ta orguyoso di ta trahando awor na San Nicolas.

   E importancia di e firmamento di e “Rules and Regulations” aki, ta cu empleado y profesional medico ta bay di acuerdo pa sigui cu e protocolnan aki, y si acaso nan no cumpli cu e debernan, e ora gerencia por hala bo atencion riba esey.  Pero nan tambe por hala atencion di gerencia, ora cu nan no ta cumpli cu debernan pa duna nan e hermentnan pa asina nan por cumpli cu e pashentnan.  Pues e protocol aki ta un “two-way street”, pues ta traha di tur dos banda.

   E momento aki ImSan tin 13 medico specialista trahando na ImSan, y nan ta spera di por haya chens pa amplia e servicionan cu nan ta brindando pa 2022 y en adelante.