Segun Presidente di Parlamento Marlon Sneek:
ORANJESTAD (AAN): Presidente di Parlamento Marlon Sneek a duna di conoce cu tin exactamente 6 reunion cu mester wordo yama ainda. Den cual, un di nan ta HOFA, cual mester wordo skirbi di nobo.
El a indica cu durante e trayecto ya a tene diferente encuentro pa discuti e tema y cu Gobierno a brinda splicacion tocante e proposicion. Ademas, un delegacion a biaha pa Hulanda pa reuni cu Raad van State, e instancia cu a emiti conseho riba HOFA.
“Un trayecto di ley, ta cuminsa discuti riba e ley na momento cu e ley bin Parlamento. Na momento cu e minister haya conseho, y basa riba e conseho aki, e ta duna su punto di bista y ta manda e totalidad pa Parlamento”, el a enfatisa.
Segun e, no por discuti riba algo cu mayan no ta existi mas. “E tipo di e cosnan aki mi ta purba di evita y ta duna tur hende e oportunidad pa por expresa nan mes y trece nan opinion dilanti pero mi mester percura tambe pa mi garantisa cu e informacion cu ta sali oficial for di Parlamento, ta informacion oficial y no tiramento di para”, Presidente di Parlamento a expresa.
Refiriendo na declaracionnan di Fraccion di MEP, cu Presidente di Parlamento no ta yama reunionnan cu nan ta pidi, el a remarca cu e mesun reunion cu oposicion yama, tur siman nan ta manda un rapel pa mustra como sifuera cu ta un peticion nobo nan a haci creando e impresion cu tin 90 reunion cu no a wordo convoca. Segun Presidente di Parlamento a enfatisa, esaki no ta mustra seriedad di oposicion.
